అమెజాన్‌ డెలివరీలో TVS విద్యుత్‌ వాహనాలు.. ఇరు కంపెనీల మధ్య ఒప్పందం

ఇంటర్నెట్‌ డెస్క్‌: ప్రముఖ ఇ-కామర్స్‌ సంస్థ అమెజాన్‌ ఇకపై వస్తువుల డెలివరీకి విద్యుత్‌ వాహనాలను వినియోగించాలని నిర్ణయించింది. ఈ మేరకు టీవీఎస్‌ మోటార్స్‌తో ఒప్పందం కుదర్చుకుంది. ఇందులో భాగంగా అమెజాన్‌ ఉత్పత్తుల డెలివరీకి టు వీలర్‌, త్రీవీలర్‌ విద్యుత్‌ వాహనాలను వినియోగించనుంది. ఇందుకోసం టీవీఎస్‌కు చెందిన 2, 3 వీలర్‌ విద్యుత్‌ వాహనాలను వినియోగించనుంది.

పర్యావరణంపై ప్రభావం తగ్గించడానికి ఈ భాగస్వామ్యం ఉపయోగపడుతుందని అమెజాన్‌ డైరెక్టర్‌ అభినవ్‌ సింగ్‌ తెలిపారు. 2025 నాటికి 10వేల విద్యుత్‌ వాహనాలను వినియోగించాలన్న కంపెనీ లక్ష్యాన్ని చేరుకోవడానికి ఈ ఒప్పందం ఉపయోగపడుతుందని భావిస్తున్నట్లు చెప్పారు. ప్రపంచవ్యాప్తంగా 2030 నాటికి లక్ష విద్యుత్‌ వాహనాలను వినియోగించాలని అమెజాన్‌ లక్ష్యంగా పెట్టుకుంది. తమ విజయవంతమైన ఐక్యూబ్‌ ఎలక్ట్రిక్‌ విద్యుత్‌ స్కూటర్‌ పరిధిని వాణిజ్య అవసరాలకు సైతం వినియోగించడానికి ఈ ఒప్పందం ఉపయోగపడుతుందని టీవీఎస్‌ ప్రతినిధి మను సక్సేనా పేర్కొన్నారు. అలాగే, అమెజాన్‌ వ్యాపార విభాగాల్లో ఎక్కడెక్కడ విద్యుత్‌ వాహనాల వినియోగానికి ఆస్కారముంటుందో రెండు కంపెనీలూ పరిశీలించనున్నాయి.