Banks Profits: రూ.1 లక్ష కోట్లు మించిన ప్రభుత్వరంగ బ్యాంకుల లాభాలు

దిల్లీ: గత ఆర్థిక సంవత్సరంలో 12 ప్రభుత్వరంగ బ్యాంకు (పీఎస్‌బీ)ల నికర లాభాలన్నీ కలిపి రూ.1 లక్ష కోట్లను అధిగమించాయి. ఇందులో దాదాపు సగం వాటా స్టేట్‌బ్యాంక్‌ ఆఫ్‌ ఇండియా (ఎస్‌బీఐ)దే. 2017-18లో పీఎస్‌బీలన్నీ కలిపి రూ.85,390 కోట్ల నికర నష్టాన్ని నమోదు చేశాయి. 2022-23లో ఇవి రూ.1,04,649 కోట్ల నికరలాభాన్ని ప్రకటించడం గమనార్హం. 2021-22లో వీటి లాభం రూ.66,539.98 కోట్ల కంటే, ఇది 57% అధికం. 2021-22లో రూ.3457 కోట్ల లాభాన్ని ఆర్జించిన పంజాబ్‌ నేషనల్‌ బ్యాంక్‌ (పీఎన్‌బీ) 2022-23లో 27% తక్కువగా రూ.2507 కోట్లే నమోదు చేసింది. నిరర్థక ఆస్తులను పారదర్శకంగా గుర్తించి, రికవరీకి చర్యలు తీసుకోవడం, పీఎస్‌బీలకు మూలధనం సమకూర్చడం, సంస్కరణలే పీఎస్‌బీల లాభాలకు కారణమని చెబుతున్నారు. 2022-23 మార్చి త్రైమాసికంలో పీఎస్‌బీల లాభాలు రూ.34,483 కోట్లుగా ఉన్నాయి. 2021-22 ఇదేకాల లాభాలు రూ.17,666 కోట్ల కంటే ఇవి 95% అధికం కావడం గమనార్హం.