ఎన్‌సీసీ లాభం రూ.190 కోట్లు

ఈనాడు, హైదరాబాద్‌: నిర్మాణ రంగ సంస్థ ఎన్‌సీసీ, మార్చి త్రైమాసికంలో రూ.4981.36 కోట్ల ఏకీకృత ఆదాయాన్ని, రూ.190.86 కోట్ల నికర లాభాన్ని నమోదు చేసింది. 2021-22 ఇదే త్రైమాసికంలో రూ.3491.76 కోట్ల ఆదాయంపై, రూ.242.13 కోట్ల నికర లాభాన్ని ఆర్జించింది. 2022-23 ఆర్థిక సంవత్సరంలో ఆదాయం రూ.15,701 కోట్లు, నికర లాభం రూ.609.20 కోట్లుగా ఉంది. రూ.2 ముఖ విలువగల ఒక్కో షేరుపై రూ.2.20 (110%) డివిడెండు ఇవ్వాలని కంపెనీ నిర్ణయించింది. 2022-23లో కంపెనీ మొత్తం రూ.25,895 కోట్ల ఆర్డర్లను సంపాదించింది. ఎన్‌సీసీ కొత్త చీఫ్‌ ఫైనాన్షియల్‌ ఆఫీసర్‌గా సంజయ్‌ పూసర్లను నియమించినట్లు, జూన్‌ 1 నుంచి ఈ నియామకం అమల్లోకి వస్తుందని ఎక్స్ఛేంజీలకు ఇచ్చిన సమాచారంలో పేర్కొంది.