ఓఎన్‌జీసీ రూ.లక్ష కోట్ల పెట్టుబడులు

2038 కల్లా నికర శూన్య కర్బన స్థితి దిశగా అడుగులు

దిల్లీ: ప్రభుత్వరంగ చమురు సంస్థ ఓఎన్‌జీసీ తన హరిత ఇంధన ప్రాజెక్టులపై 2030 కల్లా రూ.1 లక్ష కోట్ల పెట్టుబడులు పెట్టనుంది. 2038 కల్లా సున్నా కర్బన స్థాయికి చేరాలన్న లక్ష్యంలో భాగంగా ఈ నిర్ణయం తీసుకున్నట్లు కంపెనీ ఛైర్మన్‌ అరుణ్‌ కుమార్‌ సింగ్‌ పేర్కొన్నారు. పర్యావరణ సవాళ్లను ఎదుర్కొనేందుకు దేశం చేస్తున్న కృషిలో భాగంగా, ఇండియన్‌ ఆయిల్‌(ఐఓసీ), హిందుస్థాన్‌ పెట్రోలియం(హెచ్‌పీసీఎల్‌), గెయిల్‌, భారత్‌ పెట్రోలియం (బీపీసీఎల్‌) తరహాలోనే నికర సున్నా ఉద్గారాలకు ఈ కంపెనీ సైతం ప్రణాళికలు రచిస్తోంది. ‘అంతర్గత ప్రణాళికలు పూర్తయ్యాయి. 2038 కల్లా స్కోప్‌-1, స్కోప్‌-2 ఉద్గారాల విషయంలో సున్నాకు చేరగలమన్న ధీమా వచ్చింద’ని సింగ్‌ ఇక్కడ విలేకర్లతో పేర్కొన్నారు. పునరుత్పాదక వనరుల నుంచి విద్యుదుత్పత్తిని ప్రస్తుత 189 మెగావాట్ల నుంచి 2030 కల్లా 1 గిగావాట్లకు చేర్చాలన్నతి కంపెనీ ప్రణాళిక. ఇప్పటికే రాజస్థాన్‌లో 5 గిగావాట్ల ప్రాజెక్టును ప్రణాళికలు చేయగా.. ఇంతే సామర్థ్యంలో ఇంకో ప్రాజెక్టునూ చేపట్టాలని అనుకుంటోంది. ఆఫ్‌షోర్‌ పవన క్షేత్రాలతో పాటు 1 మిలియన్‌ టన్నుల వార్షిక సామర్థ్యంతో మంగళూరులో హరిత అమ్మోనియా ప్లాంటును ఏర్పాటు చేయాలనీ తలుస్తోంది. మొత్తం మీద వీటిపై రూ.1 లక్ష కోట్ల పెట్టుబడులను ఖర్చుచేయనున్నట్లు ఆయన అన్నారు.

10 కోట్ల డాలర్లలోపే రష్యాలో: ఉక్రెయిన్‌పై యుద్ధం కారణంగా, రష్యా బ్యాంకింగ్‌ కార్యకలాపాలపై పాశ్చాత్య దేశాల ఆంక్షల  నేపథ్యంలో.. రష్యాలో తమ డివిడెండు ఆదాయం 10 కోట్ల డాలర్ల (సుమారు రూ.820 కోట్ల) కంటే తక్కువే స్తంభించిందని ఓఎన్‌జీసీ విదేశ్‌ ఎండీ రాజర్షి గుప్తా పేర్కొన్నారు. ఆ నిధులను సత్వరం తెప్పించేందుకు కంపెనీ ఏమీ తొందరపడడం లేదని వివరించారు.