PM Kisan: వచ్చే వారమే బ్యాంకు ఖాతాల్లోకి పీఎం కిసాన్‌ నిధులు

ఇంటర్నెట్‌ డెస్క్‌: రైతులకు పెట్టుబడి సాయం అందించే ఉద్దేశంతో ప్రభుత్వం తీసుకొచ్చిన పీఎం-కిసాన్‌ (PM Kisan) పథకం 14వ విడత నిధుల (PM Kisan 14th installment) విడుదలకు తేదీ ఖరారైంది. వచ్చే వారమే రూ.2వేలు చొప్పున రైతుల ఖాతాల్లో జమ కానున్నాయి. ఈ సారి దేశవ్యాప్తంగా 8.5 కోట్ల మంది రైతులు ఈ నిధులు అందుకోనున్నారు. ఈ పథకం కింద ఏటా రూ.6వేలు చొప్పున మూడు విడతల్లో నిధులు విడుదల చేస్తున్న సంగతి తెలిసిందే.

ఈ ఏడాది ఫిబ్రవరిలో 13వ విడత నిధులను రైతుల ఖాతాల్లో కేంద్రం జమ చేయగా.. ఈసారి జులై 27న నిధులు విడుదల చేయనున్నారు. రాజస్థాన్‌లోని సీకర్‌లో రైతులతో నిర్వహించే కార్యక్రమంలో ప్రధాని మోదీ ఈ నిధులను విడుదల చేయనున్నారు. పీఎం కిసాన్‌ అధికారిక ట్విటర్‌ ఖాతాలో ఈ విషయాన్ని వెల్లడించారు. పీఎం కిసాన్‌ నిధులు అందుకోవాలంటే అర్హులైన రైతులు ఎన్‌పీసీఐ, ఆధార్‌తో అనుసంధానించిన బ్యాంక్‌ అకౌంట్‌ కలిగి ఉండాలి. అలాగే ఇ-కేవైసీ చేసి ఉండాలి.

₹10 లక్షల ప్రమాద బీమా ఇక ఆటోమేటిక్‌.. IRCTC నిర్ణయం

ఒకవేళ పీఎం కిసాన్‌ పథకానికి సంబంధించిన స్టేటస్ తెలుసుకోవాలన్నా, పీఎం కిసాన్‌ జాబితాలో మీ పేరు ఉందో తెలుసుకోవాలన్నా https://pmkisan.gov.in/లోకి వెళ్లి చెక్‌ చేసుకోవచ్చు. ఆయా వివరాలు పొందడానికి రిజిస్టర్డ్‌ మొబైల్‌ నంబర్‌/ ఆధార్‌ నంబర్‌ ఎంటర్‌ చేయాల్సి ఉంటుంది. పీఎం కిసాన్‌ మొబైల్‌ యాప్‌ కూడా అందుబాటులో ఉంది. అలాగే, పీఎం కిసాన్‌కు సంబంధించిన ఏమైనా సందేహాలు ఉంటే 155261 / 011-24300606 హెల్ప్‌లైన్లను సంప్రదించొచ్చు.