సాగర్‌ చెంత.. మళ్లీ సందడి

ఈనాడు, హైదరాబాద్‌: కరోనా ముందు... ఆదివారం వచ్చిందంటే అక్కడ సందడే.. సందడి. ఉదయమంతా ట్రాఫిక్‌ రణగొణ ధ్వనులతో మార్మోగే ఆ ప్రాంతం... సాయంత్రం 5 గంటలు దాటితే జనం కేరింతలతో కిటకిటలాడేది. పిల్లల నుంచి పెద్దల వరకు ట్యాంక్‌బండ్‌ వద్దకు చేరుకొని ఉత్సాహంగా.. ఉల్లాసంగా గడిపేవారు. మహమ్మారి కొవిడ్‌తో ఈ సంతోషాల ‘సండే-ఫన్‌డే’ కార్యక్రమానికి ఆటంకం ఏర్పడింది. కొన్నాళ్ల కిత్రం పరిస్థితులు మెరుగుపడినా ప్రారంభం కాలేదు. తాజాగా మళ్లీ ప్రారంభించేందుకు ప్రభుత్వం నిర్ణయించింది. ‘ఆస్క్‌...కేటీఆర్‌’ కార్యక్రమంలో భాగంగా ఈనెల 14 నుంచి యథావిధిగా కార్యక్రమాన్ని నిర్వహిస్తున్నట్లు ప్రకటించడంతో నగరవాసులు సంతోషం వ్యక్తం చేస్తున్నారు. ఆగస్టు 15న స్వాతంత్య్ర వజ్రోత్సవాలను పురస్కరించుకుని ముందు రోజు రాత్రి ఇక్కడ భారీ ఎత్తున కార్యక్రమాలు చేపట్టేందుకు హెచ్‌ఎండీఏ సిద్ధమవుతోంది.