Akasa Air: వచ్చే ఏడాది నాటికి ఆకాశ ఎయిర్‌లో 1000 ఉద్యోగాలు భర్తీ

దిల్లీ: దేశవ్యాప్తంగా కొత్తగా విమాన సేవలు ప్రారంభించిన ఆకాశ ఎయిర్‌ (Akasa Air) దాదాపు వెయ్యి ఉద్యోగాలను భర్తీ చేయనున్నట్టు  ప్రకటించింది. 2024 మార్చి నాటికి ఈ ప్రక్రియను పూర్తి చేయనున్నట్లు తెలిపింది. తద్వారా సిబ్బంది సంఖ్య 3 వేలకు పెరుగుతుందని తెలిపింది. అలాగే తన విమానాల సంఖ్యను, మార్గాలను సైతం విస్తరిస్తామని పేర్కొంది. విదేశీ ప్రయాణాలను ఈ ఏడాది చివరి నాటికి ప్రారంభించే యోచనలో ఉన్నట్లు సంస్థ సీఈవో వినయ్‌ దూబే పేర్కొన్నారు.

ఆకాశ ఎయిర్‌ 72 బోయింగ్‌ 737 మ్యాక్స్‌ విమానాలకు ఆర్డర్‌ పెట్టింది. అందులో 19 విమానాలతో తమ వాణిజ్య కార్యకలాపాలను కంపెనీ శ్రీకారం చుట్టింది. ఏప్రిల్‌లో తన 20వ విమానం అందుబాటులోకి రానుంది. దీంతో విదేశీ ప్రయాణాలకు ఆ సంస్థ అర్హత సాధిస్తుంది. వచ్చే ఆర్థిక సంవత్సరానికి మరో 9 విమానాలను అందుబాటులోకి వస్తాయని తెలిపింది. ప్రస్తుతం రోజుకు 110 విమానాలకు ఆకాశ ఎయిర్‌ నడుపుతోంది. ఇప్పటికే తమ వద్ద 2 వేలమందికి పైగా ఉద్యోగులు ఉన్నారని, వచ్చే ఆర్థిక సంవత్సరం ముగిసే సమయానికి ఆ సంఖ్యను 3 వేలకు పెంచనున్నామని దూబే తెలిపారు.