Anant Ambani - Radhika Merchant: రూ.25 కోట్ల విలువైన కార్లతో కాన్వాయ్‌.. అనంత్‌-రాధిక వీడియో వైరల్

ముంబయి: ఇటీవలే అట్టహాసంగా నిర్వహించిన ప్రీవెడ్డింగ్ వేడుకలతో ప్రపంచం దృష్టిని ఆకర్షించింది అంబానీ కుటుంబం. ముకేశ్‌ అంబానీ చిన్న కుమారుడు అనంత్‌ అంబానీ- రాధికా మర్చంట్ కొన్ని నెలల్లో వివాహ బంధంలోకి అడుగుపెట్టనున్నారు. ఈ సమయంలో వారి విలాసవంతమైన లైఫ్‌స్టైల్‌కు చెందిన కొన్ని దృశ్యాలు ఇప్పుడు నెట్టింట్లో వైరల్‌గా మారాయి. (Anant Ambani - Radhika Merchant)

అనంత్‌ జంట ఇటీవల దుబాయ్‌లో షాపింగ్ చేస్తూ కనిపించారు. ఫుల్ సెక్యూరిటీ కవర్‌లో మాల్‌కు వచ్చి షాపింగ్ చేశారు. ఆ లగేజీ తెచ్చుకోవడానికి వారు సుమారు రూ.25 కోట్ల విలువైన కార్ల కాన్వాయ్‌ను వినియోగించడంతో నెటిజన్లు ఆశ్చర్యపోతున్నారు. ఆ వాహన శ్రేణిలో రోల్స్‌రాయిస్‌ కలినాన్‌ బ్లాక్ బ్యాడ్జ్‌తో పాటు పలు లగ్జరీ కార్లు ఉన్నాయి. అలాగే అత్యవసర వైద్య సదుపాయం కోసం ఆ వాహనాల వరుసలో ఒక అంబులెన్స్ కూడా ఉంచడం గమనార్హం.

7 ఏళ్ల తర్వాత వివాహ బంధంలోకి.. అనంత్‌ - రాధిక గురించి ఈ విషయాలు తెలుసా?

రిలయన్స్ న్యూ ఎనర్జీ విభాగానికి నేతృత్వం వహిస్తోన్న అనంత్‌కు రాధికతో కొన్నేళ్ల నుంచి పరిచయం ఉంది. 2022లో అధికారికంగా ఇరు కుటుంబాలు వీరి వివాహాన్ని ధ్రువీకరించాయి. 2023 జనవరిలో నిశ్చితార్థం జరిగింది. ఈ ఏడాది జులైలో వివాహం జరగనుంది.