Instagram: ఫేస్‌బుక్‌, ఇన్‌స్టాగ్రామ్‌ సర్వీసులకు అంతరాయం

ఇంటర్నెట్‌ డెస్క్‌: ప్రముఖ సామాజిక మాధ్యమాలైన ఫేస్‌బుక్‌ (Facebook), ఇన్‌స్టాగ్రామ్‌ (Instagram), థ్రెడ్స్‌, మెసెంజర్‌ సర్వీసులకు కాసేపు అంతరాయం ఏర్పడింది. మెటా (Meta) సంస్థకు చెందిన ఈ సర్వీసులు సాంకేతిక సమస్య కారణంగా భారత్‌ సహా పలు దేశాల్లో స్తంభించడంతో నెటిజన్లు తమ ఖాతాలను ఆపరేట్‌ చేయలేక ఇబ్బందులు పడ్డారు. ఈ విషయాన్ని ట్రాకింగ్‌ వెబ్‌సైట్‌ డౌన్‌డిటెక్టర్‌ (Downdetector) తెలిపింది.

దీంతో కోట్లాది మంది నెటిజన్లు ఎందుకిలా జరిగిందో అర్థంకాక.. కాసేపు హైరానా పడ్డారు. త్వరగా సర్వీసులు పునరుద్ధరించాలంటూ ఇతర సోషల్‌ మీడియాల్లో పోస్టులు పెట్టారు. తమ ఒక్కరికే ఈ పరిస్థితి వచ్చిందా, అందరికీ ఉందా అని ఆరా తీస్తున్నారు. అయితే, వినియోగదారులు ఎదుర్కొంటున్న సమస్య తమ దృష్టికి వచ్చిందని.. దీనిపై పనిచేస్తున్నట్లు మెటా కమ్యూనికేషన్స్‌ ప్రతినిధి ఆండీ స్టోన్‌ ‘ఎక్స్‌’ వేదికగా స్పందించారు. కొద్దిసేపటికే ఒక్కొక్కటిగా సర్వీసులను పునరుద్ధరించారు.