5G Spectrum: 6 రోజుల్లో రూ.1,50,130 కోట్ల బిడ్లు

నేడూ 5జీ స్పెక్ట్రమ్‌ వేలం

దిల్లీ: 5జీ స్పెక్ట్రమ్‌ వేలం, ఆరో రోజైన ఆదివారం ముగిసేనాటికి రూ.1,50,130 కోట్ల విలువైన బిడ్‌లు దాఖలయ్యాయి. 10 కోట్లకు పైగా కనెక్షన్లున్న ఉత్తర్‌ప్రదేశ్‌ ఈస్ట్‌ సర్కిల్‌కు స్పెక్ట్రమ్‌ దక్కించుకునేందుకు సంస్థలు పోటీపడుతున్నందునే, వేలం కొనసాగుతోంది. శనివారం వరకు దేశం మొత్తంమీద కలిపి రూ.1,49,966 కోట్ల బిడ్‌లు దాఖలయ్యాయి. ఆదివారం మరో రూ.164 కోట్ల విలువైన బిడ్లు దాఖలవ్వడంతో, మొత్తం విలువ రూ.1.5 లక్షల కోట్ల మార్కును అధిగమించింది. ఆదివారం ఏడు రౌండ్లలో బిడ్డింగ్‌ జరిగింది.  సోమవారమూ వేలం కొనసాగనుంది.