ఎంఎస్‌ఎంఈల్లో మహిళా ఉద్యోగులు 24%

ఈనాడు, హైదరాబాద్‌: దేశంలో అధిక సంఖ్యలో ఉద్యోగాలు కల్పిస్తున్న సూక్ష్మ, చిన్న, మధ్యతరహా సంస్థల్లో (ఎంఎస్‌ఎంఈ) మహిళా ఉద్యోగుల సంఖ్య 24 శాతంగా ఉన్నట్లు ‘సీఐఈఎల్‌ హెచ్‌ఆర్‌ సర్వీసెస్‌’ ఒక నివేదికలో వెల్లడించింది. అయితే నాయకత్వ స్థానాల్లోని మహిళల సంఖ్య 10 శాతమేనని పేర్కొంది. ఈ నివేదిక ప్రకారం.. ఎంఎస్‌ఎంఈ విభాగానికి చెందిన సంస్థల్లో మహిళా యాజమాన్యంలోనివి సగటున 20 శాతంగా ఉన్నాయి. ఈ విషయంలో పశ్చిమ బెంగాల్‌ అగ్రస్థానంలో ఉంది. పశ్చిమ బెంగాల్‌లోని ఎంఎస్‌ఎంఈ సంస్థల్లో మహిళలకు చెందినవి 23.4 శాతం ఉన్నాయి. 10.4 శాతం వాటాతో తమిళనాడు తదుపరి స్థానంలో ఉంది. గత రెండేళ్ల కాలంలో ఈ రంగానికి చెందిన సంస్థల్లో ఉద్యోగుల సంఖ్య 45.5 శాతం పెరిగింది. ఉద్యోగులు ఒక సంస్థ నుంచి మరో సంస్థలోకి మారడం కూడా వీటిల్లో తక్కువగా ఉంది. ఎంఎస్‌ఎంఈ విభాగానికి చెందిన సంస్థల వాటా జీడీపీలో 30 శాతంగా ఉందని.. ఈ విభాగంలో ఉద్యోగాల సంఖ్య పెరగడం ఎంతో సానుకూల పరిణామమని సీఐఈఎల్‌ హెచ్‌ఆర్‌ సర్వీసెస్‌ ఎండీ ఆదిత్య నారాయన్‌ మిశ్రా అన్నారు.