ట్విటర్‌లో ఒప్పంద ఉద్యోగుల తొలగింపు!

శాన్‌ ఫ్రాన్సిస్కో: ట్విటర్‌ కొత్త యజమాని ఎలాన్‌ మస్క్‌, సంస్థను తన చేతుల్లోకి తీసుకున్న వారానికే దాదాపు సగం మంది ఉద్యోగులకు ఉద్వాసన పలికారు. తాజాగా పొరుగు సేవల విభాగంలోనూ ఉద్యోగులను తొలగిస్తున్నట్లు తెలుస్తోంది. ఈ విభాగంలో సుమారు 3,000 మందిని ముందస్తు నోటీసులు ఇవ్వకుండానే తొలగించినట్లు సమాచారం. కంపెనీ ఇ-మెయిల్‌, ఇంటర్నల్‌ కమ్యూనికేషన్‌ సిస్టమ్స్‌తో ఉద్యోగులు యాక్సెస్‌ కోల్పోయిన తర్వాతే, తాము లేఆఫ్‌లకు గురైనట్లు గుర్తించామని వారు చెప్పడం గమనార్హం. అమెరికాతో పాటు ఇతర దేశాల్లోని ట్విటర్‌ కార్యాలయాల్లో ఈ లేఆఫ్‌లు ఉన్నట్లు అంతర్జాతీయంగా కథనాలు వెలువడ్డాయి. ట్విటర్‌కు చెందిన కంటెంట్‌ మోడరేషన్‌, స్థిరాస్తి, మార్కెటింగ్‌, ఇంజినీరింగ్‌, ఇతర విభాగాల్లోని పొరుగు సేవల ఉద్యోగులు తొలగింపునకు గురయ్యారు. వారిని తొలగించినట్లు కాంట్రాక్టర్లకు ఇ-మెయిల్‌ ద్వారా సమాచారమిచ్చారట. తాజా ఉద్యోగ కోతలపై  ట్విటర్‌ /మస్క్‌ నుంచి అధికారిక ప్రకటన ఏదీ రాలేదు.