Gold price: రూ.67 వేలు దాటిన బంగారం ధర

Gold price | దిల్లీ: దేశంలో బంగారం ధర (Gold price) మళ్లీ పెరిగింది. అంతర్జాతీయ మార్కెట్‌లో పసిడి ధర పెరిగిన నేపథ్యంలో దేశీయంగా పసిడి ధర రికార్డు స్థాయికి చేరింది. ప్రస్తుతం 10 గ్రాముల మేలిమి బంగారం (24 క్యారెట్లు/999 స్వచ్ఛత) ధర దేశీయ విపణిలో రూ.67 వేల మార్కును దాటింది. గురువారం సాయంత్రం 6 గంటల సమయానికి బులియన్‌ విపణిలో రూ.67,200 వద్ద ట్రేడ్‌ అవుతోంది. వెండి కిలో ధర రూ.74,900 వద్ద కొనసాగుతోంది.

అంతర్జాతీయ మార్కెట్లో ఔన్సు బంగారం ధర 2,152 డాలర్ల వద్ద ట్రేడవుతోంది. వెండి ఔన్సు 24.10 డాలర్ల వద్ద కొనసాగుతోంది. అమెరికాలో వడ్డీరేట్లు ఈ ఏడాదే తగ్గిస్తామని ఫెడరల్‌ రిజర్వ్‌ ఛైర్మన్‌ జెరోమ్‌ పావెల్‌ చేసిన వ్యాఖ్యలు బంగారం ధరలు పెరగడానికి కారణమని అనలిస్టులు చెబుతున్నారు. వచ్చే వారం ఫిబ్రవరి నెలకు గాను వెలువడే అమెరికా కన్జూమర్‌ ప్రైస్‌ ఇండెక్స్‌ డేటా బంగారం ధరల గమనాన్ని నిర్దేశించవచ్చని భావిస్తున్నారు.