Maruti Invicto: 3 వరుసల మారుతీ ఇన్విక్టో బుకింగ్స్‌ ప్రారంభం

దిల్లీ: మూడు వరుసలు ఉండే ప్రీమియం ఎస్‌యూవీ ఇన్విక్టో (Invicto)ను మారుతీ సుజుకీ (Maruti Suzuki) త్వరలో విడుదల చేయనుంది. దీని బుకింగ్‌లను సోమవారం నుంచి ప్రారంభించింది. జూలై 5న ఇది మార్కెట్‌లోకి రానుంది. కంపెనీ ప్రీమియం కార్ల రిటైల్‌ కేంద్రాలైన నెక్సా షోరూమ్‌లలో వీటిని బుక్‌ చేసుకోవచ్చు. లేదా మారుతీ సుజుకీ (Maruti Suzuki) ఇండియా వెబ్‌సైట్‌లోనూ బుకింగ్స్ అందుబాటులో ఉన్నాయి. రూ.25 వేలు చెల్లించి కారును బుక్‌ చేసుకోవచ్చు.

మూడు వరుసలు ఉండే ప్రీమియం కార్ల సెగ్మెంట్‌లోకి మారుతీ సుజుకీ ఇన్విక్టో ద్వారా ఎంట్రీ ఇవ్వబోతోంది. రూ.20 లక్షల పైన విలువ చేసే కార్ల సెగ్మెంట్‌లో పట్టు సాధించడమే ధ్యేయంగా దీన్ని తీసుకొస్తోంది. రూ.15-20 లక్షల సెగ్మెంట్‌లో గత ఏడాది కంపెనీ మంచి విక్రయాలను నమోదు చేసింది. మూడు వరుసల ఎస్‌యూవీ/ఎంపీవీ సెగ్మెంట్‌లో గత ఏడాది 2.58 లక్షల యూనిట్ల వాహనాలు అమ్ముడైనట్లు మారుతీ సుజుకీ సీనియర్‌ ఎగ్జిక్యూటివ్‌ ఆఫీసర్‌ శశాంక్‌ శ్రీవాస్తవ పేర్కొన్నారు. వీటిలో రూ.20 లక్షలపైన విలువ చేసే కార్లు 1.2- 1.25 లక్షలుగా ఉన్నట్లు వెల్లడించారు. ఎస్‌యూవీతో పాటు ఎంపీవీ ఫీచర్లు కూడా ఉండే మూడు వరుసల కార్లు కావాలనుకునేవారిని దృష్టిలో ఉంచుకునే ఇన్విక్టోను తీసుకొస్తున్నట్లు తెలిపారు.