Whatsapp వీడియో కాలింగ్‌లో గూగుల్‌ మీట్‌ తరహా ఫీచర్‌!

ఇంటర్నెట్‌ డెస్క్‌: వాట్సాప్‌లో (Whatsapp) త్వరలో మరో కొత్త ఫీచర్‌ రాబోతోంది. ఇటీవల మెసేజ్‌ ఎడిట్‌, చాట్‌ లాక్‌ వంటి ఫీచర్లు ప్రకటించిన ఆ సంస్థ.. త్వరలో వీడియో కాలింగ్‌లో స్క్రీన్‌ షేరింగ్‌ (screen-sharing) ఆప్షన్‌ను సైతం తీసుకొస్తోంది. జూమ్‌, గూగుల్‌ మీట్‌ వంటి యాప్స్‌లో వీడియో కాల్స్‌ చేసేటప్పుడు స్క్రీన్‌ షేర్‌ చేసుకునే ఆప్షన్‌ ఉంది. ఇదే ఆప్షన్‌ను తీసుకురాబోతోంది. ప్రస్తుతం కొందరు బీటా టెస్టర్లకు అందుబాటులో ఉన్న ఈ ఫీచర్‌.. త్వరలో యూజర్లకు అందుబాటులోకి రానుందని వాబీటా ఇన్ఫో తెలిపింది.

ఎవరితోనైనా వీడియో కాల్‌ మాట్లాడుతున్నప్పుడు మన మొబైల్‌ స్క్రీన్‌ను అవతలి వ్యక్తులకు షేర్‌ చేయడం ఈ ఆప్షన్‌ ఉద్దేశం. వాట్సాప్‌ సైతం ఇదే ఫీచర్‌ను తన యాప్‌లో తీసుకొస్తోంది. ఇందుకోసం స్క్రీన్‌ అడుగు భాగంలో కొత్తగా స్క్రీన్‌ షేరింగ్‌ బటన్‌ను వాట్సాప్‌ ఇస్తోంది. ఈ బటన్‌ను క్లిక్‌ చేస్తే మీ ఫోన్‌లో చేసే ప్రతిదీ రికార్డు అవ్వడంతో పాటు అవతలి వ్యక్తికి షేర్‌ అవుతుంది. దీనికి యూజర్‌ అనుమతి తప్పనిసరి.

అయితే, పాత ఆండ్రాయిడ్‌ వెర్షన్‌ ఉన్న ఫోన్లలోనూ, పాత వాట్సాప్‌ వెర్షన్లలోనూ ఈ ఫీచర్‌ పనిచేయకపోవచ్చు. అలాగే ఎక్కువ సంఖ్యలో గ్రూప్‌ వీడియో కాలింగ్‌ మాట్లాడుతున్నప్పుడు స్క్రీన్‌ షేరింగ్‌ ఫీచర్‌ పనిచేయకపోవచ్చని తెలుస్తోంది. అయితే, బీటా టెస్టర్లకు అందుబాటులో ఉన్న ఈ ఫీచర్‌ కొన్ని వారాల్లో యూజర్లకు అందుబాటులోకి వచ్చే అవకాశం ఉంది. అలాగే యూజర్లు ఇకపై తమ ఖాతాలకు యూజర్‌ నేమ్‌లు పెట్టుకునే సదుపాయాన్నీ వాట్సాప్‌ తీసుకురానుంది. ప్రస్తుతానికి ఇది పరీక్షల దశలో ఉంది.