Blue Dart: బ్లూడార్ట్‌ కీలక నిర్ణయం.. ‘భారత్‌ డార్ట్‌’ పేరుతో ఆ సేవలు

Bharat Dart | దిల్లీ: దేశం పేరు ఇక ఇండియాకు బదులు భారత్‌ అని మారుస్తారంటూ చర్చ జరుగుతున్న వేళ ప్రముఖ లాజిస్టిక్‌ కంపెనీ బ్లూడార్ట్‌ (Blue Dart) కీలక ప్రకటన చేసింది. భారత్‌లో ప్రీమియం సేవల్లో ఒకటైన డార్ట్‌ ప్లస్‌ సేవలను ఇకపై భారత్‌ డార్ట్‌గా (Bharat Dart) వ్యవహరించనుంది. బ్లూడార్ట్‌ ప్రయాణంలో ఇదొక మైలురాయని, తమ వ్యూహాత్మక మార్పునకు నిదర్శనమని బ్లూడార్ట్‌ తన కంపెనీ ఫైలింగ్‌లో పేర్కొంది. భారత్‌ అవసరాలను తీర్చడంలో తమ నిబద్ధతను ఇది తెలియజేస్తోందని తెలిపింది. భారత్‌ను ప్రపంచానికి అనుసంధానం చేసే తమ ఈ ప్రయాణంలో భాగస్వామ్యపక్షాలన్నీ పాలుపంచుకోవాలని బ్లూడార్ట్‌ ఎక్స్‌ప్రెస్‌ పేర్కొంది.

కార్లకు 6 ఎయిర్‌బ్యాగ్‌లు తప్పనిసరి కాదు: గడ్కరీ

ఇండియా, భారత్‌ అనే పేర్లపై చర్చ జరుగుతున్న వేళ బ్లూడార్ట్‌ తమ సేవలకు పేరు మార్చడం ప్రాధాన్యం సంతరించుకుంది. ఇటీవల జీ20 నేతలకు రాష్ట్రపతి పంపిన ఆహ్వాన ప్రతుల్లో ‘భారత్‌’ అని పేర్కొనడం దేశవ్యాప్త చర్చకు దారితీసింది. జీ20 శిఖరాగ్ర సదస్సులోనూ మోదీ తన నేమ్‌ ప్లేట్‌ను భారత్‌గా పేర్కొన్నారు. ఈ నేపథ్యంలో సెప్టెంబర్‌ 18న పార్లమెంట్‌ ప్రత్యేక సమావేశానికి ప్రభుత్వం పిలుపునిచ్చింది. ఈ సమావేశాల్లో పేరు మార్పునకు సంబంధించి ఏదైనా నిర్ణయం వెలువడే అవకాశం ఉందంటూ ఊహాగానాలు వినవస్తున్నాయి.