2023 ఏప్రిల్‌ నుంచి పెట్రోల్‌లో 20% ఇథనాల్‌

చమురు శాఖ మంత్రి హర్‌దీప్‌ పురి

పానీపట్‌ (హరియాణా): వచ్చే ఏడాది ఏప్రిల్‌ నుంచి ఎంపిక చేసిన పెట్రోల్‌ బంకుల్లో 20 శాతం ఇథనాల్‌ కలిపిన పెట్రోల్‌ (ఇ 20 పెట్రోల్‌) సరఫరాను ప్రారంభించనున్నట్లు చమురు శాఖ మంత్రి హర్‌దీప్‌ పురి వెల్లడించారు. ఆ తర్వాత క్రమంగా ఈ సరఫరా పెంచుతామన్నారు. పర్యావరణ సమస్యలకు పరిష్కారంతో పాటు, చమురు దిగుమతుల బిల్లు తగ్గించుకునేందుకు ఈ ప్రక్రియ దోహద పడుతుందన్నారు. 2025 నాటికి దేశవ్యాప్తంగా ఇ 20 పెట్రోల్‌ సరఫరా చేస్తామని తెలిపారు. 2022 నవంబరుకు 10 శాతం ఇథనాల్‌తో పెట్రోల్‌ సరఫరా చేయాలని లక్ష్యంగా పెట్టుకోగా.. ఈ ఏడాది జూన్‌లోనే లక్ష్యాన్ని భారత్‌ సాధించింది. దీంతో 20 శాతం ఇథనాల్‌ కలిపిన పెట్రోల్‌ సరఫరా లక్ష్యాన్ని 5 ఏళ్లు మందుకు తీసుకొస్తున్నట్లు మంత్రి వివరించారు. ప్రపంచ బయోఫ్యూయల్‌ దినోతవ్సం సందర్భంగా రెండో తరం (2జీ) ఇథనాల్‌ ప్లాంట్‌ను ప్రధాన మంత్రి నరేంద్ర మోదీ బుధవారం అంకితం చేశారు. దేశంలో బయోఫ్యూయల్స్‌ వినియోగం, ఉత్పత్తి పెంచాలన్న ప్రభుత్వ లక్ష్యాలకు ఈ ప్లాంట్‌ దోహదపడనుంది. ఐఓసీ రూ.900 కోట్ల పెట్టుబడులతో పానీపట్‌ రిఫైనరీ సమీపంలో ఈ ప్లాంట్‌ను ఏర్పాటు చేసింది. ఏడాదికి 2 లక్షల టన్నుల వరి గడ్డిని 3 కోట్ల లీటర్ల ఇథనాల్‌గా ఈ ప్లాంట్‌లో మార్చనున్నారు. పెట్రోల్‌లో 10 శాతం ఇథనాల్‌ కలపడం వల్ల రూ.41,500 కోట్ల విదేశీ మారకపు ద్రవ్యం మిగిలిందని, 27 లక్షల టన్నుల గ్రీన్‌హౌస్‌ గ్యాస్‌ ఉద్గారాలు తగ్గాయని, రైతులకు రూ.40,600 కోట్లకు పైగా చెల్లింపులు జరిగాయని పురి వెల్లడించారు.