S-Presso: మారుతీ ఎస్‌-ప్రెస్సో మరింత కొత్తగా.. ధర ఎంతంటే?

దిల్లీ: భారత్‌లో అతిపెద్ద వాహన తయారీ సంస్థ మారుతీ సుజుకీ తమ ఎంట్రీ-లెవెల్‌ హ్యాచ్‌బ్యాక్‌ ఎస్‌-ప్రెస్సోలో కొత్త వెర్షన్‌ను తీసుకొచ్చింది. దీని ధరల శ్రేణి రూ.4.25 లక్షల నుంచి రూ.5.99 లక్షలు (ఎక్స్‌-షోరూం). మాన్యువల్‌ వేరియంట్స్‌ కార్ల ధర రూ.4.25 లక్షల నుంచి రూ.5.46 లక్షల వరకు ఉంది. అదే ఆటోమేటిక్‌ వెర్షన్‌ ధర రూ.5.66 లక్షల వద్ద ప్రారంభమై రూ.5.99 లక్షల వరకు ఉంది. 

ఈ కొత్త ఎస్‌-ప్రెస్సో 1-లీటర్‌ పెట్రోల్‌ ఇంజిన్‌తో వస్తోంది. ఇడిల్‌-స్టార్‌-స్టాప్‌ టెక్నాలజీతో వస్తున్న ఈ కారు 25.3 కి.మీ మైలేజీ ఇస్తుందని కంపెనీ తెలిపింది. పాత వెర్షన్లతో పోలిస్తే ఇంధన సామర్థ్యం పెరిగినట్లు వెల్లడించింది. రెండు ఎయిర్‌బ్యాగ్‌లు, హై-స్పీడ్‌ అలర్ట్‌ సిస్టం, రివర్స్‌ పార్కింగ్‌ సెన్సార్స్‌ను అన్ని వేరియంట్లలో పొందుపరిచారు. ఆటోమేటిక్‌ వెర్షన్లలో హిల్‌ హోల్డ్‌ అసిస్ట్‌ , ఎలక్ట్రానిక్‌ స్టెబిలిటీ ప్రోగ్రాం వంటి అదనపు ఫీచర్లు ఉన్నాయి. 

ఎస్‌యూవీ డిజైన్‌ను పోలి ఉండే ఎస్‌-ప్రెస్సో.. హ్యాచ్‌బ్యాక్‌ సెగ్మెంట్‌లో మంచి ఆదరణ పొందిందని మారుతీ సుజుకీ ఇండియా సీనియర్‌ ఎగ్జిక్యూటివ్‌ డైరెక్టర్‌ శశాంక్‌ శ్రీవాస్తవ వెల్లడించారు. మూడేళ్ల క్రితం విడుదలైన ఈ మోడల్‌లో ఇప్పటి వరకు 2,02,500 యూనిట్లు విక్రయించినట్లు తెలిపారు.