Maruti Suzuki S-Cross: మారుతీ సుజుకీ ఎస్‌-క్రాస్‌ ప్రయాణం ఇక ముగిసినట్లేనా?

ఇంటర్నెట్‌ డెస్క్‌: ప్రముఖ దేశీయ వాహన తయారీ సంస్థ మారుతీ సుజుకీ తీసుకొచ్చిన ఎస్‌-క్రాస్‌ కార్ల విక్రయాలు ఇక ఆగిపోనున్నట్లు తెలుస్తోంది. ఈ మోడల్‌ను కంపెనీ తమ నెక్సా వెబ్‌సైట్‌ నుంచి తొలగించింది. విక్రయాలు పూర్తిగా పడిపోయిన నేపథ్యంలోనే కంపెనీ ఈ నిర్ణయం తీసుకున్నట్లు సమాచారం. మరోవైపు ఇటీవల సరికొత్త గ్రాండ్‌ విటారాను మారుతీ విడుదల చేయడంతో ఎస్‌-క్రాస్‌కు ఆదరణ పూర్తిగా కరవైంది.

మారుతీ సుజుకీ 2015లో ఎస్‌-క్రాస్‌ను విడుదల చేసింది. తొలుత ఇది డీజిల్‌ ఇంజిన్‌తో మాత్రమే వచ్చింది. అయితే, ఎప్పుడూ ఆశించిన స్థాయిలో మాత్రం విక్రయాలు జరగలేదు. 2020లో బీఎస్‌-6 నిబంధనలు అమల్లోకి రావడంతో డీజిల్‌ వెర్షన్‌ తయారీని నిలిపివేసి పెట్రోల్‌ ఇంజిన్‌తో తీసుకొచ్చారు. అయినా, ఈ కారు వినియోగదారులను ఆకట్టుకోవడంలో విఫలమైంది. అప్పటికే హ్యుందాయ్‌ క్రెటా, కియా సెల్టోస్‌ విపణిలోకి వచ్చేయడంతో ఎస్‌-క్రాస్‌ వైపు చూసేవారే కరవయ్యారు. దీంతో చేసేదిలేక కంపెనీ గత నెలలో ఈ మోడల్‌ కార్ల తయారీని నిలిపివేసింది. తాజా విక్రయాలు కూడా ఆపేసినట్లు తెలుస్తోంది.