Meesho: మీషో పండగ విక్రయాల్లో 68 శాతం వృద్ధి

దిల్లీ: ఈ నెల 23-27 మధ్య జరిగిన ఐదు రోజుల ప్రత్యేక పండగ సేల్‌లో తమ విక్రయాలు 68 శాతం పెరిగాయని మీషో తెలిపింది. దాదాపు 3.34 కోట్ల ఆర్డర్లు అందినట్లు వెల్లడించింది. వీటిలో 60 శాతం టైర్‌-4 పట్టణాల నుంచి వచ్చినట్లు తెలిపింది. ఆర్డర్‌ పెట్టిన మొత్తం వినియోగదారుల్లో దాదాపు 60 శాతం మంది తొలిసారి ఆన్‌లైన్‌ షాపింగ్‌ చేసినవారని పేర్కొంది. ఈ సేల్‌ సందర్భంగా మీషో సున్నా శాతం విక్రేతల కమిషన్‌ను ప్రకటించింది. దీంతో సూక్ష్మ, చిన్న, మధ్య తరహా పరిశ్రమలు దాదాపు రూ.104 కోట్ల వరకు ఆదా చేసుకున్నాయని కంపెనీ తెలిపింది. 

వంటిగదిలో ఉపయోగించే వస్తువులకు గిరాకీ భారీగా పెరిగినట్లు మీషో తెలిపింది. ఈ కేటగిరీ విక్రయాల్లో 116 శాతం వృద్ధి నమోదైందని పేర్కొంది. సౌందర్య, వ్యక్తిగత సంరక్షణ ఉత్పత్తుల విక్రయాల్లో 109 శాతం, లగేజ్‌-ప్రయాణ సంబంధిత వస్తువుల విక్రయాలు 99 శాతం పెరిగినట్లు తెలిపింది. మహా దీపావళి సేల్‌ అక్టోబర్‌ 7-11 మధ్య జరగనున్నట్లు తెలిపింది.