BMW X7: భారత్‌లోకి బీఎండబ్ల్యూ కొత్త కారు.. ధర ₹ 1.22 కోట్లు!

ముంబయి: జర్మనీకి చెందిన విలాసవంతమైన కార్ల తయారీ కంపెనీ బీఎండబ్ల్యూ ఇండియా 2023 మోడల్‌ ఎక్స్‌7 (BMW X7)  కారును భారత మార్కెట్లోకి విడుదల చేసింది. ఈ కారు పెట్రోల్‌, డీజిల్‌ ఇంజిన్‌ వేరియంట్‌లో అందుబాటులో ఉంది. బీఎండబ్ల్యూ పెట్రోల్‌ ఇంజిన్‌ వేరియంట్  X7 xDrive40i M Sport ధర ₹ 1.22 కోట్లు (Ex-showroom), డీజిల్‌ ఇంజిన్‌ వేరియంట్ X7 xDrive40d M Sport ధర ₹ 1.25 కోట్లు (Ex-showroom)గా కంపెనీ నిర్ణయించింది. ఈ కారును విడిభాగాలుగా దిగుమతి చేసుకుని బీఎండబ్ల్యూ చెన్నై ప్లాంట్‌లో వీటిని అసెంబుల్‌ చేయనున్నారు. మార్చి 2023 నుంచి కారు డెలివరీలు ప్రారంభంకానున్నాయి. 

బీఎండబ్ల్యూ ఎక్స్7 కారులో ఆరు సిలిండర్లతో 3.0 లీటర్ల ఇంజిన్‌ను అమర్చారు. పెట్రలో ఇంజిన్‌ 5,200-6,250 ఆర్‌పీఎం వద్ద 375 బీహెచ్‌పీ శక్తిని, 1,850-5,000 ఆర్‌పీఎం వద్ద 520 ఎన్‌ఎం టార్క్‌ను విడుదల చేస్తుంది. ఇక, డీజిల్‌ ఇంజిన్‌ 4,400 ఆర్‌పీఎం వద్ద 335 బీహెచ్‌పీ శక్తిని, 1,750-2,250 ఆర్‌పీఎం వద్ద 700 ఎన్‌ఎం టార్క్‌ను ఉత్పత్తి చేస్తుంది. ఈ రెండు ఇంజిన్‌లకు 8-స్పీడ్ ఆటోమేటిక్‌ గేర్ బాక్స్‌ను ఇచ్చారు. కేవలం 5.8 సెకన్ల వ్యవధిలో 0-100 km వేగాన్ని అందుకుంటుంది. కంఫర్ట్‌, ఎఫిషియంట్‌, స్పోర్ట్‌, స్పోర్ట్‌ ప్లస్‌ అని నాలుగు డ్రైవ్‌ మోడ్‌లు ఇందులో ఉన్నాయి. ప్రయాణికుల భద్రత కోసం ఇందులో అత్యాధునిక ఫీచర్లు ఇస్తున్నారు. 

‘‘బీఎండబ్ల్యూ ఎక్స్‌ సిరీస్‌లో ఎక్స్‌7కు ప్రత్యేక స్థానం ఉంది. లగ్జరీ, వేగం, పవర్‌ కలయికగా కంపెనీ ఈ కారును అభివృద్ధి చేసింది. ఆకర్షణీయమైన డిజైన్‌, అత్యాధునిక ఫీచర్స్‌తో వస్తున్న 2023 బీఎండబ్ల్యూ ఎక్స్7 వినియోగదారులను మరింతగా ఆకట్టుకుంటుంది’’ అని భావిస్తున్నట్లు బీఎండబ్ల్యూ గ్రూప్‌ ఇండియా ప్రెసిడెంట్ విక్రమ్‌ పవాహ్‌ తెలిపారు.