ఎస్‌బీఐ బాటలో బ్యాంక్ ఆఫ్ బ‌రోడా.. ‘బరోడా తిరంగా’ పేరిట కొత్త డిపాజిట్ స్కీమ్‌

ఇంటర్నెట్‌ డెస్క్‌: ప్రభుత్వ రంగ బ్యాంకుల్లో ఒకటైన బ్యాంక్‌ ఆఫ్ బ‌రోడా ‘బ‌రోడా తిరంగా’ పేరిట డిపాజిట్ ప‌థ‌కాన్ని ప్రారంభించింది. రెండు కాల‌వ్య‌వ‌ధుల‌పై ఈ పథకం అందుబాటులో ఉంటుంది. 444 రోజుల కాల‌వ్య‌వ‌ధి గల ఫిక్స్‌డ్‌ డిపాజిట్‌పై ఏడాదికి 5.75% చొప్పున‌, 555 రోజుల కాల‌వ్య‌వ‌ధి గల ఫిక్స్‌డ్‌ డిపాజిట్‌పై ఏడాదికి 6.00% చొప్పున వ‌డ్డీ ల‌భిస్తుంది. ఈ ప‌థ‌కం ఆగ‌స్టు 16 నుంచి డిసెంబ‌ర్ 31 వరకు అమ‌ల్లో ఉంటుంది. రూ. 2 కోట్ల కంటే త‌క్కువ డిపాజిట్ల‌కు ఈ ప‌థ‌కం వ‌ర్తిస్తుంది. సీనియ‌ర్ సిటిజ‌న్లు ఏడాదికి 0.50% అద‌న‌పు వ‌డ్డీ రేటును పొందుతారు.

దేశానికి స్వాతంత్య్రం వ‌చ్చి 75 ఏళ్లు పూర్త‌యిన సంద‌ర్భంగా ఈ కొత్త డిపాజిట్ల‌ను అందుబాటులోకి తీసుకొచ్చినట్లు బ్యాంక్ ఆఫ్‌ బరోడా తెలిపింది. ‘ఆజాదీ కా అమృత్ మ‌హోత్స‌వ్‌’ సంద‌ర్భంగా ఎస్‌బీఐ కూడా ‘ఉత్స‌వ్ డిపాజిట్‌’ పేరిట ఓ డిపాజిట్‌ పథకాన్ని ప్ర‌వేశ‌పెట్టింది. ఈ ప‌థ‌కంలో ఎస్‌బీఐ 1000 రోజుల కాల‌వ్య‌వ‌ధితో ఫిక్స్‌డ్ డిపాజిట్ల‌పై సంవ‌త్స‌రానికి 6.10% వ‌డ్డీ రేటును అందిస్తోంది. సీనియ‌ర్ సిటిజ‌న్లకు 0.50% అద‌న‌పు వ‌డ్డీ రేటును పొందుతారు. ఈ వ‌డ్డీ రేట్లు ఆగస్టు 15 నుంచి అమ‌ల్లోకి వచ్చాయి. ఈ ప‌థ‌కం 75 రోజుల పాటు అందుబాటులో ఉంటుంది.