ICICI Bank loan case: బాంబే హైకోర్టులో కొచ్చర్‌ దంపతులకు దక్కని ఊరట

దిల్లీ: వీడియోకాన్‌ (Videocon )రుణ వ్యవహారంలో ఐసీఐసీఐ (ICICI bank) మాజీ సీఈఓ చందాకొచ్చర్‌, ఆమె భర్త దీపక్‌ కొచ్చర్‌లకు బాంబే హైకోర్టులో నిరాశ ఎదురైంది. సీబీఐ (CBI) అరెస్ట్‌ను సవాల్‌ చేస్తూ అత్యవసర విచారణ జరపాలంటూ దాఖలు చేసిన పిటిషన్‌ను కోర్టు తోసిపుచ్చింది. జనవరి 2న సాధారణ విచారణ కోసం కోర్టును ఆశ్రయించాలని సూచించింది.

ఐసీఐసీఐ బ్యాంక్‌ రుణం కేసులో చందాకొచ్చర్‌, దీపక్‌ కొచ్చర్‌ను సీబీఐ ఈ నెల 23న అరెస్ట్‌ చేసిన సంగతి తెలిసిందే. వీరికి ప్రత్యేక కోర్టు మూడు రోజుల రిమాండ్‌ విధించింది. అదనపు గడువు కోరుతూ సీబీఐ అప్పీల్‌ చేసింది. దీంతో కొచ్చర్‌ దంపతులకు 28 వరకు రిమాండ్‌ పొడిగించింది. అయితే, మనీలాండరింగ్‌ నిరోధక చట్టం కింద సీబీఐ అరెస్ట్‌ అక్రమమని పేర్కొంటూ చందా కొచ్చర్‌ దంపతులు బాంబే హైకోర్టును ఆశ్రయించారు. ఈ వ్యవహారంపై అత్యవసర విచారణ జరపాలని కోరారు. అందుకు కోర్టు నిరాకరించింది. 

మరోవైపు ఈ కేసులో వీడియోకాన్‌ గ్రూపు వ్యవస్థాపకుడు వేణుగోపాల్‌ ధూత్‌ను సైతం సీబీఐ సోమవారం అరెస్ట్‌ చేసింది. ఉదయం కొంతసేపు విచారించాక, ముంబయిలో ఆయన్ను అరెస్ట్‌ చేశారు. కొచ్చర్‌ దంపతులతో పాటు వేణుగోపాల్‌ ధూత్‌ను డిసెంబరు 28 వరకు సీబీఐ కస్టడీకి పంపుతూ ప్రత్యేక కోర్టు ఆదేశాలిచ్చింది. బ్యాంక్‌ రుణ విధానానికి విరుద్ధంగా, ఆర్‌బీఐ మార్గదర్శకాలను ఉల్లంఘించి ధూత్‌ ప్రమోట్‌ చేసిన వీడియోకాన్‌ గ్రూప్‌ కంపెనీలకు రూ.3,250 కోట్ల రుణాన్ని ఐసీఐసీఐ బ్యాంక్‌ మంజూరు చేసిందన్నది సీబీఐ ఆరోపణ. ‘నీకిది-నాకది’లో భాగంగా దీపక్‌ కొచ్చర్‌ సంస్థల్లో రూ.64 కోట్లను ధూత్‌ పెట్టుబడులు పెట్టారని పేర్కొంది.