డిసెంబరులో రెపో రేటు 0.35% పెంపు!

ఆర్థిక వేత్తల అంచనా
దిల్లీ

రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ద్రవ్య పరపతి కమిటీ డిసెంబరు 5-7 తేదీల్లో నిర్వహించే సమీక్షలో రెపో రేటును 35 బేసిస్‌ పాయింట్ల మేర పెంచొచ్చని ఎక్కువమంది ఆర్థికవేత్తలు అంచనా వేస్తున్నారు. అక్టోబరులో రిటైల్‌ ద్రవ్యోల్బణం స్వల్పంగా తగ్గినందున, రెపోరేట్ల పెంపులో ఆర్‌బీఐ నెమ్మదించే అవకాశం ఉందని అంటున్నారు. మొత్తం 15 అంచనాల్లో.. అత్యధికులు 35 బేసిస్‌ పాయింట్ల పెంపును అంచనా వేయగా, ఇద్దరు మాత్రం 50 బేసిస్‌ పాయింట్ల పెంపు ఉండొచ్చని అభిప్రాయపడ్డారు. ఈ ఏడాది మే నుంచి ఆర్‌బీఐ కీలక రెపో రేటును 190 బేసిస్‌ పాయింట్లు పెంచి 5.90 శాతం చేసింది.

* అక్టోబరులో రిటైల్‌ ద్రవ్యోల్బణం 6.77 శాతానికి చేరింది.  ఈ ఏడాది జనవరి నుంచి చూస్తే, వరుసగా 10వ నెలా ఆర్‌బీఐ లక్ష్యమైన 2-6 శాతం ఎగువనే ఇది కొనసాగింది. జనవరి-మార్చిలో రిటైల్‌ ద్రవ్యోల్బణ సగటు 6.3 శాతం కాగా.. ఏప్రిల్‌- జూన్‌లో 7.3 శాతం, జులై-సెప్టెంబరులో 7 శాతంగా నమోదైంది.  

* ‘దేశీయ ద్రవ్యోల్బణం స్వల్పంగా తగ్గింది. అమెరికా ద్రవ్యోల్బణం సైతం గరిష్ఠాల నుంచి వెనక్కి వచ్చింది. దీంతో డిసెంబరులో ఆర్‌బీఐ రెపో రేటును 0.35 శాతం పెంచి 6.25 శాతం చేసే అవకాశం ఉంది. గత వడ్డీ రేట్ల పెంపుల ప్రభావం, నగదు లభ్యతను కఠినతరం చేయడం, అంతర్జాతీయ పరిస్థితులను ఈసారి పరిగణనలోకి తీసుకోవచ్చు’ అని కోటక్‌ ఇన్‌స్టిట్యూషనల్‌ ఈక్విటీస్‌ సీనియర్‌ ఆర్థికవేత్త సువోదీప్‌ రక్షిత్‌ అన్నారు. వచ్చే కొన్ని నెలల పాటు కూడా రిటైల్‌ ద్రవ్యోల్బణం 6 శాతం పైనే కొనసాగొచ్చని, 2023 ఫిబ్రవరికి 6 శాతానికి, మార్చికి 5 శాతానికి చేరొచ్చని అంచనా వేశారు.

* ఆహార వస్తువులపై ధరల ఒత్తిడి కొనసాగుతోందని, దేశీయ, అంతర్జాతీయ కారణాలు ప్రభావం చూపుతున్నట్లు క్వాంట్‌ఎకో రీసెర్చ్‌ పేర్కొంది. స్వల్పకాలంలో ద్రవ్యోల్బణం అధిక స్థాయుల్లోనే కొనసాగొచ్చని తెలిపింది.

* డిసెంబరులో 35 బేసిస్‌ పాయింట్లు, 2023 ఫిబ్రవరిలో 25 బేసిస్‌ పాయింట్ల మేర రెపోరేటు పెంపులు ఉండొచ్చని నొమురా అంచనా వేసింది.