ఆరోగ్య బీమా.. అపోహలు వీడితేనే ధీమా

ఆరోగ్య అత్యవసర పరిస్థితి ఎప్పుడు, ఎలా వస్తుందో చెప్పలేం. దీన్ని తట్టుకోవాలంటే.. ఆర్థికంగా ఎల్లవేళలా సిద్ధంగా ఉండాలి. వైద్య ఖర్చులను తట్టుకునేలా ఆరోగ్య బీమా పాలసీ ఉన్నప్పుడే ఇది సాధ్యం అవుతుంది. కొవిడ్‌ తర్వాత కొన్నాళ్లపాటు ఈ పాలసీలను తీసుకునేందుకు చాలామంది ముందుకు వచ్చారు. కానీ, ఇప్పుడు ఈ ధోరణి మారింది. ఈ నేపథ్యంలో ఆరోగ్య బీమా పాలసీ విషయంలో ఉండే సాధారణ అపోహలు, వాస్తవాలేమిటి.. తెలుసుకునే ప్రయత్నం చేద్దాం.

పెరుగుతున్న వైద్య ఖర్చులు అందరికీ ఆందోళన కలిగిస్తున్నాయి. కొన్ని నివేదికల ప్రకారం చూస్తే వైద్య ద్రవ్యోల్బణం ఏటా 20 శాతం వరకూ ఉంటోంది. ఆధునిక వైద్య చికిత్సలు అందుబాటులోకి వస్తున్న కొద్దీ వ్యయం అధికం అవుతూనే ఉంది. కాబట్టి, మంచి ఆరోగ్య బీమా పాలసీ ఉన్నప్పుడే ఆర్థికంగా మనపై ఒత్తిడి ఉండదు. పొదుపు, పెట్టుబడుల మొత్తాన్నీ వెనక్కి తీసుకోవాల్సిన అవసరం లేదు.

నేను ఆరోగ్యంగానే ఉన్నాను కదా! ఇప్పుడు పాలసీ అవసరమా?

ఆరోగ్య బీమా పాలసీని కొనుగోలు చేసేందుకు అనువైన సమయం మీరు ఆరోగ్యంగా ఉన్నప్పుడే అని మర్చిపోవద్దు. చిన్న వయసులోనే ఈ పాలసీని తీసుకోవడం వల్ల తక్కువ ప్రీమియం ఉంటుంది. ఎలాంటి ఆరోగ్య సమస్యలు ఉండవు కాబట్టి, సులభంగా పాలసీ లభిస్తుంది. వయసు పెరుగుతున్న కొద్దీ అనారోగ్యం దరిచేరే అవకాశాలు ఉంటాయి. అప్పుడు పాలసీ తీసుకోవాలంటే అధిక ప్రీమియం ఉంటుంది. పైగా ముందస్తు వ్యాధులకు వేచి ఉండే సమయం నిబంధన వర్తిస్తుంది. ఆరోగ్య బీమా పాలసీ అంటే.. కేవలం వ్యాధులు వచ్చినప్పుడే ఉపయోగపడేది కాదు.. ప్రమాదాలు ఏ వయసులో ఉన్నవారికైనా జరగవచ్చనేది ఇక్కడ గమనించాల్సిన విషయం. అనుకోని ప్రమాదం వల్ల ఆసుపత్రిలో చేరినప్పుడూ ఆరోగ్య బీమా చికిత్స ఖర్చులను     చెల్లిస్తుంది. కాబట్టి, ఆరోగ్య బీమా పాలసీ తీసుకోవడాన్ని వాయిదా వేయడం ఎప్పుడూ మంచిది కాదు. పాలసీ తీసుకున్నంత మాత్రాన క్లెయిం చేసుకోవాలని భావించకూడదు. సాధ్యమైనంత వరకూ ఈ పాలసీ అవసరం రాకుండా ఉండటమే మంచిది.  

తక్కువ ప్రీమియం పాలసీలను తీసుకోవడమే మంచిదా?

ఆరోగ్య బీమా పాలసీల విషయంలో చాలామంది వెనకడుగు వేసేందుకు కారణం ప్రీమియం కాస్త అధికంగా ఉండటమే. ఏటా ప్రీమియం చెల్లించడం కష్టం అవుతుందని భావిస్తుంటారు. తక్కువ ప్రీమియంతో అధిక రక్షణ ఇచ్చే టర్మ్‌ పాలసీలను ఎంచుకోవచ్చు. కానీ, ఆరోగ్య బీమా పాలసీలను తీసుకునేటప్పుడు కేవలం ప్రీమియం ఒక్కటే పరిగణనలోకి తీసుకోవడం సరికాదు. ఏ రెండు సంస్థల పాలసీలూ, ఒకే సంస్థ అందించే రెండు పాలసీలూ ఒకే విధంగా రక్షణ కల్పించవు. కాబట్టి, అవసరం ఏమిటి? నిబంధనలు ఎలా ఉన్నాయి? ఆసుపత్రిలో చేరినప్పుడు నగదు రహిత చికిత్స, మినహాయింపులు, ఉప పరిమితులు, అదనపు ప్రయోజనాల్లాంటివి చూసి పాలసీని ఎంచుకోవాలి. కాస్త అధిక ప్రీమియం ఉన్నా కొన్నిసార్లు తప్పదు.

యాజమాన్యం అందించే బృంద ఆరోగ్య బీమా ఉంది. మళ్లీ ప్రత్యేకంగా సొంత బీమా పాలసీ అవసరమా?

తమ ఉద్యోగుల ప్రయోజనం కోసం యాజమాన్యాలు బృంద ఆరోగ్య బీమా పాలసీని అందిస్తాయి. నిజానికి ఇది ఎంతో మంచి పాలసీ. తల్లిదండ్రులకూ ఇందులో రక్షణ లభిస్తుంది. ఇందులో కొన్ని పరిమితులు ఉంటాయి. ఉద్యోగంలో కొనసాగినన్ని రోజులే ఈ బీమా రక్షణ ఉంటుంది. ఉద్యోగం మానేసినా, పదవీ విరమణ చేసినా ఇది దూరం అవుతుంది. కొన్నిసార్లు ఈ పాలసీలను వ్యక్తిగత పాలసీలుగా మార్చుకునే వీలుంటుంది. ఇది బీమా సంస్థల విచక్షణపై ఆధారపడి ఉంటుంది. కాబట్టి, ఉద్యోగంలో ఉన్నప్పుడు అదనపు రక్షణగా సొంతంగా ఒక ఆరోగ్య బీమాను తీసుకోవాలి. కనీసం రూ.5 లక్షల విలువైన ఫ్యామిలీ ఫ్లోటర్‌ పాలసీ ఉండేలా చూసుకోవాలి.

పాలసీ తీసుకున్న మొదటి రోజు నుంచే రక్షణ ప్రారంభం అవుతుంది.

ప్రమాదం లాంటి కొన్ని ప్రత్యేక పరిస్థితుల్లో మాత్రమే పాలసీ తీసుకున్న మొదటి రోజు నుంచి రక్షణ ప్రారంభం అవుతుంది. కొత్తగా పాలసీ తీసుకున్నప్పుడు కనీసం 30 రోజుల పాటు వేచి ఉండే వ్యవధి ఉంటుంది. ముందస్తు వ్యాధులు ఉన్నప్పుడు ఇది 36-48 నెలలపాటు ఉండొచ్చు. నాలుగేళ్ల వ్యవధి ముగిసిన తర్వాత సాధారణంగా ఎలాంటి నిబంధనలు ఉండకపోవచ్చు.

క్రిటికల్‌ ఇల్‌నెస్‌ తీసుకుంటే సరిపోతుంది కదా?

తీవ్ర వ్యాధులు సోకినప్పుడు పరిహారం ఇచ్చేది క్రిటికల్‌ ఇల్‌నెస్‌ పాలసీ. గుండెపోటు, క్యాన్సర్‌, మూత్రపిండాల వ్యాధుల్లాంటి 8-20 తీవ్ర వ్యాధుల్లో ఏదైనా వచ్చిందని తేలితే నిర్ణీత పరిహారం చెల్లిస్తుంది. కొన్నిరకాల శస్త్ర చికిత్సలకూ ఇది అందుబాటులో ఉంది. పాలసీ తీసుకున్న 90 రోజుల వరకూ జీవించి ఉన్నప్పుడే పరిహారం అందిస్తాయి. సాధారణ ఆరోగ్య బీమా పాలసీలతో పోలిస్తే ఇవి ప్రత్యేకమే. ఆసుపత్రిలో చేరినప్పుడు చికిత్స ఖర్చులను చెల్లించే ఆరోగ్య బీమా పాలసీకి తోడుగా మాత్రమే క్రిటికల్‌ ఇల్‌నెస్‌ పాలసీ ఉండాలి.