Child Education: పిల్లల ఉన్నత విద్య కోసం ఎలా ప్లాన్‌ చేయాలి?

ఇంటర్నెట్‌ డెస్క్‌: తల్లిదండ్రులు తమ పిల్లల ఉన్నత విద్యకు చాలా ప్రాధాన్యమిస్తున్నారు. గత 20 ఏళ్లలో విద్యారంగంలో చాలా మార్పులు వచ్చాయి. మార్పులు తగ్గట్టుగా ఖర్చులు కూడా భారీగానే పెరిగాయి. ప్రణాళికగా వ్యవహరించేవారు మాత్రమే ఈ ఉన్నత విద్య ఖర్చుల విషయంలో సక్సెస్‌ అవ్వగలరు. అంతేకాకుండా తల్లిదండ్రులు పిల్లల విద్యను ఒక ఖర్చుగా కాకుండా పెట్టుబడిగా చూడడం ప్రారంభించారు. అందువల్ల పిల్లలు పసిప్రాయంలో ఉన్నప్పుడే పెద్దలు మదుపు ఆరంభించాలి. మదుపు ఆలస్యం అయ్యేకొద్దీ కార్పస్‌ సరిపోక ఆర్థిక సమస్యలకు దారితీయవచ్చు. కాబట్టి, తల్లిదండ్రులు తమ పిల్లల ఉన్నత విద్య కోసం తగిన జాగ్రత్తలు తీసుకుంటూ ప్రణాళికతో ముందుకెళ్లాలి. 

ముందే మదుపు ప్రయత్నాలు

పిల్లల ఉన్నత విద్య అనేది దీర్ఘకాలిక ఆర్థిక లక్ష్యం. ఇది 18 నుంచి 20 ఏళ్ల వరకు ఉండొచ్చు. ఇంత సమయం ఉంది కదా అని చాలా తల్లిదండ్రులు తమ పెట్టుబడులను ప్లాన్‌ చేయడానికి ఆలస్యం చేస్తారు. ఇది ఏమాత్రం కరెక్ట్‌ కాదు. ఒక్క సంవత్సరం ఆలస్యం చేయడం వల్ల కూడా పెట్టుబడి మొత్తంపై గణనీయంగా ప్రభావం చూపుతుంది. ఉదాహరణకు ముందుచూపుతో మీ బిడ్డ పుట్టిన వెంటనే పెట్టుబడులు ప్రారంభించారు అనుకుందాం. 12% సగటు రాబడితో 20 ఏళ్లలో రూ.1 కోటి లక్ష్యాన్ని సాధించడానికి నెలకు రూ.10 వేల కంటే కొంచెం ఎక్కువ పెట్టుబడి పెట్టాలి. ఇదే లక్ష్యాన్ని చేరుకోవడానికి పెట్టుబడిని రెండు ఏళ్లు ఆలస్యం చేశారనుకోండి.. నెలకు రూ.13,100 మదుపు చేయాలి. అదే 5 ఏళ్లు ఆలస్యం చేస్తే, నెలకు రూ.20 వేల వరకు మదుపు చేయాలి. అదే లక్ష్యాన్ని చేరుకోవడానికి పొదుపును 10 ఏళ్లకు కుదిస్తే, నెలకు రూ.43 వేలకు పైగానే పొదుపు చేయాల్సి ఉంటుంది. ఇది ప్రారంభ మొత్తం కంటే నాలుగు రెట్ల కంటే ఎక్కువ. 

ప్రతి సంవత్సరం ఆలస్యం అయ్యేకొద్దీ ఉన్నత విద్య కోసం చేసే పొదుపు పెంచాల్సి ఉంటుంది. అందుచేత మదుపును ముందుగానే ప్రారంభించడం వల్ల ఆర్థిక ఒత్తిడి లేకుండా మంచి ఆర్థిక ప్రయోజనాన్ని పొందొచ్చు. అంతేకాకుండా ఆర్థిక అత్యవసర పరిస్థితులు, ఆదాయంలో హెచ్చుతగ్గులు మీ పిల్లల విద్యా ప్రణాళికలకు అంతరాయం కలిగించవచ్చు. అందుచేతే ముందుగానే మదుపు ప్లాన్‌ చేయడం వల్ల ఇలాంటి హెచ్చుతగ్గులను బ్యాలెన్స్‌ చేసుకోవచ్చు.

ద్రవ్యోల్బణం అంచనా

భవిష్యత్ విద్యా ఖర్చును తక్కువగా అంచనా వేయకూడదు. ద్రవ్యోల్బణాన్ని లెక్కించడంలో విఫలమైతే అవసరమైన నిధులను సరిగ్గా అంచనా వేయలేం. ఎందుకంటే సాధారణ ద్రవ్యోల్బణం సగటున 6-7% ఉంటే విద్యా ద్రవ్యోల్బణం 10-12% వరకు ఉంటుంది. దీనివల్ల ఉన్నత విద్యకు ఎవరూ ఊహించని ఫీజులు, ఖర్చులను భరించవలసి ఉంటుంది. ఉదాహరణకు నేటి ఉన్నత విద్యా కోర్సు ఫీజు రూ.15 లక్షలు అయితే, 18 ఏళ్లలో నిస్సందేహంగా చాలా పెరుగుతుంది. సగటు విద్యా ద్రవ్యోల్బణం రేటు 10% అనుకుంటే.. 18 ఏళ్లకు ఇదే ఉన్నత విద్య ఫీజు రూ.84 లక్షలకు చేరుతుంది. విద్యా ద్రవ్యోల్బణం ఇంకా పెరిగిందంటే మరింత ఎక్కువ ఖర్చులకు దారితీస్తుంది. అందుచేత మీ భవిష్యత్‌ ఆర్థిక అవసరాలను నిర్ణయించేటప్పుడు ద్రవ్యోల్బణాన్ని తప్పక పరిగణించండి.

అదనపు ఖర్చులు

పిల్లల విద్య కోసం ఆలోచించేటప్పుడు చాలా మంది తల్లిదండ్రులు ట్యూషన్‌ ఫీజులపై మాత్రమే దృష్టి పెడతారు. ఒక్క ట్యూషన్‌ ఫీజుతోనే విద్య ముగియదు. ఉన్నత విద్యకు సంబంధించి అనేక ఇతర ఖర్చులుంటాయి. విద్యార్థి వసతి, మంచి ఆహారం, కోర్సు మెటీరియల్‌, విదేశీ చదువు అయితే కరెన్సీ ఎక్స్చేంజీ రుసుములు, జీవనశైలి ఖర్చులు, ప్రయాణ ఛార్జీలు, పన్నులు వంటి ఇతర అనుబంధ ఖర్చులు కూడా ఉంటాయి. అంతేకాకుండా ఈ ఖర్చులు కూడా ద్రవ్యోల్బణం వల్ల ప్రతి ఏడాదికి పెరుగుతూ ఉంటాయి. అందుచేత నిధులు పొదుపు చేసేటప్పుడు ఈ ఖర్చులను పరిగణనలోకి తీసుకోవాలి.

మదుపు-మ్యూచువల్‌ ఫండ్లు

ఉన్నత విద్యకు దీర్ఘకాలంలో నిధులు అవసరం పడుతుంది. కాబట్టి, మదుపు చేసేటప్పుడు సంప్రదాయ పెట్టుబడులవైపు చూడకపోవడమే మంచిది. ఈక్విటీ మ్యూచువల్‌ ఫండ్లలో మదుపు చేస్తేనే విద్యా ద్రవ్యోల్బణ ఖర్చులను తట్టుకోవచ్చు. ఉదాహరణకు బ్యాంకు/పోస్టాఫీసులో ఆర్‌డీలో సగటున 7% రాబడితో ప్రతి నెలా రూ.10 వేలు చొప్పున పొదుపు చేస్తే 15 ఏళ్లకు రూ.31.88 లక్షలకు చేరుకుంటుంది. అదే మ్యూచువల్‌ ఫండ్లలో మదుపు చేస్తే  సగటు రాబడిని 12 శాతంతో లెక్కకడితే రూ.50.45 లక్షలు వరకు లభించొచ్చు. పైగా మ్యూచువల్‌ ఫండ్లతో పోలిస్తే బ్యాంకు ఆర్‌డీలపై వచ్చే రాబడిపై అధిక ఆదాయ పన్ను ఉంటుంది. దీర్ఘకాలిక మదుపుకు ఈక్విటీ ఫండ్లను ఎంచుకోవడం వల్ల గరిష్ఠ రాబడితో పాటు, కొంత వరకు పన్ను ఆదా ప్రయోజనాలు పొందొచ్చు. అయితే ఈక్విటీ మ్యూచువల్‌ ఫండ్ల పెట్టుబడులపై రిస్క్‌ ఉంటుంది. మదుపుచేసేవారు ఈ విషయాన్ని గమనించాలి.

సరిపడినంత పెట్టుబడి

చాలా మంది తల్లిదండ్రులు పిల్లలు చిన్న వయసులో ఉన్నప్పుడు వారి ప్రస్తుత చదువును, దీర్ఘకాలంలో విద్యా కోర్సులను సరిగ్గా అంచనా వేయలేకపోతుంటారు. దీంతో ఉన్నత విద్యకు మదుపు చేసేటప్పుడు తక్కువ మొత్తంతో సరిపెడుతుంటారు. కానీ, ఉన్నత విద్యకు మదుపు చేసేటప్పుడు ఆర్థిక లక్ష్యం కూడా ఉన్నతంగా/ఎక్కువగానే ఉండాలి. లక్ష్యాలకు అవసరమైన మొత్తాన్ని తప్పనిసరిగా అంచనా వేయాలి. దాని ప్రకారం ప్రతి నెలా పొదుపు ఉండాలి. పెట్టుబడులకు సిప్‌ విధానాన్ని ఎంచుకోవడం మంచిది. ఉదాహరణకు 20 ఏళ్లకు చదువు కోసం రూ.1 కోటి అవసరం పడుతుందనుకుందాం. మీరు 13% సీఏజీఆర్‌తో ఈక్విటీ మ్యూచువల్‌ ఫండ్‌లో నెలవారీ రూ.3 వేలు మాత్రమే పెట్టుబడి పెడితే.. మొత్తం పెట్టుబడి విలువ కేవలం రూ.34.36 లక్షలు మాత్రమే అవుతుంది. ఈ నిధి అప్పటి ఉన్నత విద్యకు ఏ మాత్రం సరిపోదు. నిర్దేశిత లక్ష్యాన్ని గడువులోగా చేరుకోవడానికి మీరు నెలవారీగా దాదాపు రూ.9 వేల వరకు పెట్టుబడి పెట్టవలసి ఉంటుంది.

పదవీ విరమణ నిధి

పిల్లల ఉన్నత విద్యకు.. తల్లిదండ్రులు తాము కూడబెట్టుకున్న పదవీ విరమణ నిధిని ఖర్చు చేయకూడదు. ఎందుకంటే వారికి డబ్బు అవసరం పడితే వృద్ధాప్యంలో ఎక్కడా రుణం లభించకపోవచ్చు. కాబట్టి, విద్యకు పొదుపు నిధులు సరిపోనప్పుడు బ్యాంకు రుణం తీసుకోవడం మేలు. దీనివల్ల ఆ రుణాన్ని తీర్చే బాధ్యతను కూడా పిల్లలకు అప్పజెప్పొచ్చు. పిల్లలు సంపాదించడం ప్రారంభించినప్పుడు రుణాన్ని తిరిగి చెల్లించేస్తారు. దీంతో ఆర్థిక ఇబ్బందులు లేకుండా తమ పదవీ విరమణ జీవితాన్ని పెద్దలు కొనసాగించవచ్చు.

సంపాదించే వ్యక్తికే జీవిత బీమా

చాలా మంది బీమా ఏజెంట్లు తమ వ్యాపారం వృద్ధి చేసుకోవడం కోసం చైల్డ్‌ ఇన్సూరెన్స్‌ పాలసీలను పిల్లల పేరు మీద చేయించమని అడుగుతుంటారు. కానీ, పిల్లల పేరు మీద బీమాను తీసుకోకపోవడమే మంచిది. జీవిత బీమా కవరేజ్‌ ఎప్పుడూ కూడా సంపాదించే సభ్యుడి జీవితంపై ఉంటేనే మేలు. తగినంత టర్మ్‌ బీమా లాంటిది తల్లిదండ్రులకు ఉంటేనే మంచిది. దురదృష్టవశాత్తు వారికేమైనా జరిగితే భవిష్యత్‌లో పిల్లలకు అన్ని అవసరాలకు సరిపోతుంది. ముఖ్యంగా విద్య ఆగకుండా కొనసాగుతుంది.

ఆరోగ్య బీమా

ప్రస్తుతం చాలా మంది ఆరోగ్య బీమా పరిధిలో ఉంటున్నారు. అయితే, పిల్లలు పుట్టిన తర్వాత వారిని కూడా ఆరోగ్య బీమా పథకంలో చేర్చండి. సాధారణంగా నవజాత శిశువును 90 రోజుల తర్వాత పాలసీలో చేర్చవచ్చు. ముఖ్యంగా పిల్లల చదువు రాజీ పడకూడదనుకున్నట్లే, వారి ఆరోగ్యం విషయంలో కూడా రాజీ పడకూడదు. బీమా లేనప్పుడు వారికేమైన అనారోగ్య సమస్యలొస్తే చాలా ఖర్చవ్వచ్చు. దీనివల్ల, తల్లిదండ్రుల ఆర్థిక లక్ష్యాలు కూడా దెబ్బతినొచ్చు. కాబట్టి, కుటుంబంలో అందరికీ సరిపడినంత ఆరోగ్య బీమా ఉండాలి. దీనివల్ల ఉన్నత విద్య కోసం సమకూర్చుకుంటున్న నిధికి ఇబ్బంది లేకుండా ఉంటుంది.