Festival Sale: ఐఫోన్‌, పిక్సెల్‌, నథింగ్‌.. ప్రీమియం ఫోన్లపై పండగ ఆఫర్లివే!

Festival Sale | ఇంటర్నెట్‌ డెస్క్‌: ప్రీమియం ఫోన్లు వాడాలని చాలా మంది అనుకుంటారు. కానీ, ఖరీదు ఎక్కువగా ఉండడం వల్ల కొనడానికి వెనకాడుతుంటారు. అందుకే ఆఫర్లు ఉన్నప్పుడే వాటిని సొంతం చేసుకోవడానికి ప్రయత్నించాలి! పండగ సీజన్‌ నేపథ్యంలో ప్రారంభమవబోతున్న ప్రత్యేక సేల్‌ (Festive Sales) అందుకు మంచి అవకాశం. ఇప్పటికే ఇ-కామర్స్ సంస్థలు అమెజాన్‌ (Amazon), ఫ్లిప్‌కార్ట్‌ (Flipkart), ఎలక్ట్రానిక్స్‌ తయారీ సంస్థలు ప్రత్యేక సేల్‌ వివరాలు ప్రకటించాయి. గూగుల్‌ పిక్సెల్‌, నథింగ్‌, యాపిల్‌ ఫోన్లను మంచి ఆఫర్లపై అందిస్తున్నాయి. ఆ వివరాలేంటో చూద్దాం..

రూ.36,500కే పిక్సెల్‌ ఫోన్‌..

ఫ్లిప్‌కార్ట్‌ బిగ్‌ బిలియన్‌ డేస్‌ సేల్‌ (Flipkart Big Billion Days sale) అక్టోబర్‌ 8 నుంచి ప్రారంభం కానుంది. ఈ ప్రత్యేక సేల్‌లో యాపిల్‌, గూగుల్‌ పిక్సెల్‌, నథింగ్‌ ఫోన్లపై మంచి ఆఫర్లు ఉన్నాయి. గూగుల్‌ పిక్సెల్‌ 7ఏ (Google Pixel 7a) ఫోన్‌ రిటైల్‌ ధర రూ.43,999. కానీ, తాజా పండగ సేల్‌లో ఇది ఫ్లిప్‌కార్ట్‌లో రూ.31,499కే అందుబాటులో ఉంది. ఎక్స్ఛేంజ్‌, బ్యాంక్‌ ఆఫర్లతో కలిపి ఈ ధరకు లభించనుంది. 8GB ర్యామ్‌, 128GB స్టోరేజ్‌తో వస్తున్న ఈ ఫోన్‌ ఈ ఏడాది మే నెలలో విడుదలైన విషయం తెలిసిందే. పిక్సెల్‌ 7 ఫోన్‌ (Google Pixel 7)పైనా ఫ్లిప్‌కార్ట్‌ రాయితీ అందిస్తోంది. రూ.59,999 ధర వద్ద విడుదలైన ఈ ఫోన్‌ రూ.36,499 వద్ద లభిస్తోంది. పిక్సెల్‌ 7 ప్రో (Google Pixel 7 pro)పై కూడా ఆఫర్లు ఉండొచ్చని టెక్‌ నిపుణులు అంచనా వేస్తున్నారు. మరోవైపు పిక్సెల్‌ 8 సిరీస్‌ ఫోన్లు త్వరలో విడుదల కానున్న విషయం తెలిసిందే. ఇవి కూడా సేల్‌ (Flipkart Big Billion Days sale)లో అందుబాటులో ఉండనున్నట్లు ఫ్లిప్‌కార్ట్‌ వెబ్‌సైట్‌లో పేర్కొంది. 

మెగా సేల్స్‌కు రెడీనా..? అయితే ఈ టిప్స్‌ ఫాలో అవ్వండి..

ఐఫోన్లపై డీల్స్‌..

తాజా పండగ సేల్‌లో భాగంగా ఫ్లిప్‌కార్ట్, అమెజాన్‌.. ఐఫోన్లపై భారీ తగ్గింపును ఆఫర్‌ చేస్తున్నాయి. అమెజాన్‌ గ్రేట్‌ ఇండియన్‌ ఫెస్టివల్‌ సేల్‌ (Amazon Great Indian Festival sale), ఫ్లిప్‌కార్ట్‌ బిగ్‌ బిలియన్‌ డేస్‌ సేల్‌లో వివిధ ఆఫర్లను ఉపయోగించుకొని తక్కువ ధరకే సొంతం చేసుకోవచ్చు. ఫ్లిప్‌కార్ట్‌లో ఐఫోన్‌ 12 పండగ సేల్‌లో భాగంగా రూ.38,999కే అందుబాటులో ఉంది. ఈ ఫోన్‌ రూ.79,900 ధరతో 2020లో విడుదలైన విషయం తెలిసిందే. అయితే, ఐఫోన్‌ 13, 14, 15 విడుదలైన తర్వాత ఈ ఫోన్‌ ధరలను యాపిల్‌ తగ్గించింది. తాజా సేల్‌లో రూ.3,000 కార్డు ఆఫర్, రూ.3,000 ఎక్స్ఛేంజ్‌ ఆఫర్‌ తర్వాత రూ.32,999కే దక్కించుకోవచ్చు.

మరోవైపు ఐఫోన్‌ 13పై అమెజాన్‌ తగ్గింపు ధర (iPhone 13 Price) వద్ద అందిస్తోంది. 2021లో విడుదలైన ఈ ఫోన్‌లో బేస్‌ వేరియంట్‌ 128జీబీ స్టోరేజ్‌ ఆప్షన్‌తో వస్తోంది. తాజా సేల్‌లో ఇది రూ.39,999కే అందుబాటులో ఉన్నట్లు వెల్లడించింది. ఎస్‌బీఐ బ్యాంక్ కార్డు, ఎక్స్ఛేంజ్‌ ఆఫర్ల తర్వాత ఈ ధరకు ఫోన్‌ లభించనుంది. ఐఫోన్‌ 14, ఐఫోన్‌ 14 ప్లస్ స్మార్ట్‌ఫోన్లు సైతం తగ్గింపు ధరకే అందుబాటులో ఉంటాయని అమెజాన్‌ ప్రకటించింది. కానీ, ఆ ధర ఎంత అనేది మాత్రం వెల్లడించలేదు. మరోవైపు ఈ ఫోన్లు వరుసగా రూ.50 వేలలోపు, రూ.60 వేలలోపు ధరకే లభించనున్నట్లు ఫ్లిప్‌కార్ట్‌ ప్రకటించింది. కానీ, ఆ ధరలు ఎంతనేది బహిర్గతం చేయలేదు. 2022 సెప్టెంబర్‌లో ఐఫోన్‌ 14, 14 ప్లస్‌ వరుసగా రూ.79,900, రూ.89,900 ధరతో విడుదలైన విషయం తెలిసిందే.

సేల్‌లో అందుబాటులో ఉన్న మరికొన్ని ప్రీమియం ఫోన్లు..

• శాంసంగ్‌ గెలాక్సీ ఎస్‌23 అల్ట్రా (Samsung galaxy S23 Ultra) 5జీ ఫోన్‌ ధర రూ.1,24,999 కాగా.. తాజా సేల్‌ ఇది అమెజాన్‌లో రూ.1,16,999కి అందుబాటులో ఉంది. అలాగే గెలాక్సీ ఎస్‌23 (Samsung galaxy S23 5G) 5జీ ఎంఆర్‌పీ రూ.64,999. సేల్‌లో ఇది రూ.61,999 ధరకు లభిస్తోంది. బ్యాంక్‌ ఆఫర్లు, సేల్‌ ప్రత్యేక తగ్గింపు, ఎక్స్ఛేంజ్‌ ఆఫర్లను కలిపిన తర్వాత ఈ ధరలు వర్తిస్తాయి. గెలాక్సీ ఎస్‌22 అల్ట్రాను అన్ని ఆఫర్ల తర్వాత రూ.74,999కు సొంతం చేసుకోవచ్చు.
• రూ.57,999 ధర వద్ద విడుదలైన రియల్‌మీ జీటీ 2 ప్రో (Realme GT2 Pro) ఫోన్‌.. ఫ్లిప్‌కార్ట్ బిగ్‌ బిలియన్‌ డేస్‌ సేల్‌లో రూ.26,999కే లభిస్తోంది. అయితే, ఈ ఫోన్లు సేల్‌లో పరిమిత సంఖ్యలో మాత్రమే అందుబాటులో ఉన్నట్లు రియల్‌మీ తెలిపింది.
• నథింగ్‌ ఫోన్‌ 1 (Nothing Phone 1) 5జీ ధర రూ.37,999 కాగా.. తాజా ఫ్లిప్‌కార్ట్‌ సేల్‌లో ఇది రూ.23,999కి లభించనుంది.
• మోటోరోలా రేజర్‌ 40 (Motorola razr 40) ఫోన్‌ జులైలో రూ.59,999 ప్రారంభ ధర వద్ద విడుదలైంది. తాజా సేల్‌ అమెజాన్‌లో ఇది రూ.49,999కు అందుబాటులో ఉంది.
• వన్‌ప్లస్‌ 11ఆర్‌ 5జీ (OnePlus 11R 5G) ఫోన్‌ తాజా సేల్‌లో రూ.34,999 లభిస్తోంది. దీని అసలు ధర రూ.45,999.