Google Maps: గూగుల్ మ్యాప్స్‌లో ఈ ఫీచర్‌తో మీ ఇంధనం ఆదా!

Google maps | ఇంటర్నెట్‌డెస్క్‌: ఇప్పటివరకు రూట్‌ తెలుసుకోవడానికి, షార్ట్‌కట్‌ల కోసం, వేగం తెలుసుకోవడానికి ఉపయోగపడే గూగుల్‌ మ్యాప్స్‌ (Google Maps) ఇకపై ఇంధనాన్ని ఆదా చేయడంలోనూ సాయపడనుంది. ప్రయాణ సమయంలో ఇంధనాన్ని ఆదా చేయడం కోసం గూగుల్‌ మ్యాప్స్‌ కొత్త ఫీచర్‌ని అందుబాటులోకి తీసుకొచ్చింది. ‘ఫ్యూయెల్​సేవింగ్’ పేరుతో ఈ ఫీచర్‌ని యూజర్లకు పరిచయం చేసింది. ఇప్పటికే అమెరికా, ఐరోపా, కెనడాలో అందుబాటులో ఉన్న ఈ ఫీచర్‌ తాజాగా భారత్‌కూ తీసుకొచ్చింది.

గూగుల్‌ మ్యాప్స్ తీసుకొచ్చిన ఈ కొత్త ఫీచర్‌ని ఎనేబల్‌ చేసుకుంటే.. లైవ్‌ ట్రాఫిక్‌ అప్‌డేట్లు, రహదార్లు, ట్రాఫిక్‌ పరిస్థితులతో పాటు ఇంధన సామర్థ్యంపై అంచనా వేస్తుంది. వాహన వేగం, ఇంధన వినియోగం రెండింటినీ పరిగణలోకి తీసుకొని అందుకు అనుకూలమైన మార్గాన్ని చూపుతుంది. ఎంచుకున్న మార్గం ఆధారంగా ఎంత మేరకు ఇంధనం ఖర్చవుతుందో తెలియజేస్తుంది. దీంతో ఇంధనం ఆదా అయ్యే అవకాశం ఉంటుంది.

19 నుంచి హ్యాపీ ఫోర్జింగ్స్‌ ఐపీఓ.. పూర్తి వివరాలు ఇవే..!

ఈ ఫీచర్‌ను ఎనేబుల్‌ చేసుకోవాలంటే.. గూగుల్‌ మ్యాప్స్ యాప్‌ని ఓపెన్ చేసి ప్రొఫైల్‌పై క్లిక్ చేయాలి. అందులో ‘Settings’లోకి వెళ్లి ‘Navigation settings’ని ఎంచుకొని కిందకు స్క్రోల్ చేయగానే ‘Route options’ అనే ట్యాబ్‌ కనిపిస్తుంది. అందులో ‘Prefer fuel-efficient routes’ అనే ఆప్షన్‌ ఉంటుంది. దాన్ని ఎనేబుల్ చేసుకోవాలి. తర్వాత మీ వాహన ఇంజిన్‌, ఇంధనం రకాల్ని ఎంచుకోవాలి. అలాగే నావిగేషన్‌ ట్యాబ్‌లోనే టోల్‌ ధర, స్పీడోమీటర్‌ వంటి ఆప్షన్లు కూడా యూజర్లు ఎంపిక చేసుకోవచ్చు. ఈ ఫీచర్ల ద్వారా వాహన వేగాన్ని తెలుసుకోవడంతో పాటు ఆ రూట్లో టోల్‌ ఛార్జీలు ఎంత చెల్లించాలో కూడా చూపిస్తుంది.