India GDP: ఈ ఏడాది జీడీపీ 7.3%.. కేంద్రం అంచనా

India GDP | దిల్లీ: దేశయ ఆర్థిక వ్యవస్థ వృద్ధి అంచనాలను కేంద్ర గణాంక కార్యాలయం (NSO) వెలువరించింది. ప్రస్తుత ఆర్థిక సంవత్సరంలో (2023-24) స్థూల దేశీయోత్పత్తి (GDP) 7.3 శాతం మేర వృద్ధి నమోదు చేయొచ్చని అంచనా వేసింది. గతేడాది వృద్ధి రేటు 7.2 శాతంగా ఉంది. జీడీపీకి సంబంధించి తొలి అంచనాలను ఈ మేరకు శుక్రవారం వెలువరించింది.

• వాస్తవ జీడీపీ లేదా స్థిర ధరల (2011-12) వద్ద జీడీపీ ప్రస్తుత ఆర్థిక సంవత్సరంలో రూ.171.79 లక్షల కోట్లుగా నమోదు కావొచ్చని ఎన్‌ఎస్‌ఓ అంచనా వేసింది. 2022-23లో ఇది రూ.160.06 లక్షల కోట్లుగా ఉంది.
• ప్రస్తుత ధరల వద్ద నామమాత్రపు జీడీపీ రూ.296.58 లక్షల కోట్లుగా నమోదు కావొచ్చని ఎన్‌ఎస్‌ఓ అంచనా కట్టింది. 2022-23లో ఇది రూ.272.41 లక్షల కోట్లుగా ఉంది. ఆర్‌బీఐ సైతం ఈ ఏడాది 7 శాతం వృద్ధి నమోదు కావొచ్చని గతేడాది డిసెంబర్‌లో వెలువరించిన అంచనాల్లో పేర్కొంది. 6.5 శాతం మేర నమోదు కావొచ్చని తొలుత అంచనా వేసింది.