స్థిరాస్తి రంగంలో...

హెచ్‌డీఎఫ్‌సీ మ్యూచువల్‌ ఫండ్‌ కొత్తగా హెచ్‌డీఎఫ్‌సీ నిఫ్టీ రియాల్టీ ఇండెక్స్‌ ఫండ్‌ అనే పథకాన్ని తీసుకొచ్చింది. ఈ పథకం న్యూ ఫండ్‌ ఆఫర్‌ (ఎన్‌ఎఫ్‌ఓ) ఈ నెల 21న ముగుస్తుంది. కనీస పెట్టుబడి రూ.100. ఇది ఇండెక్స్‌ తరగతికి చెందిన ఓపెన్‌ ఎండెడ్‌ పథకం. నిఫ్టీ రియాల్టీ ఇండెక్స్‌ టీఆర్‌ఐ సూచీని ఈ పథకం పనితీరుకు కొలమానంగా తీసుకుంటారు. దీర్ఘకాలంలో రియాల్టీ కంపెనీలు ఆకర్షణీయమైన లాభాలు ఆర్జిస్తాయని, ఈ రంగానికి చెందిన కంపెనీలపై పెట్టుబడి పెట్టి, మదుపరులకు అధిక ప్రతిఫలాన్ని సంపాదించాలనేది ఈ పథకం లక్ష్యం. తమ పెట్టుబడుల్లో కొంత వైవిధ్యం ఉండాలని, ముఖ్యంగా రియల్‌ ఎస్టేట్‌ రంగంలో పరోక్షంగా మదుపు చేయాలనుకునే వారికి ఈ పథకం అనువుగా ఉంటుంది.

స్థిరమైన రాబడి కోసం..

 హీలియోస్‌ మ్యూచువల్‌ ఫండ్‌ నూతన బ్యాలెన్స్‌డ్‌ అడ్వాంటేజ్‌ ఫండ్‌ను ఆవిష్కరించింది. హీలియోస్‌ బ్యాలెన్స్‌డ్‌ అడ్వాంటేజ్‌ ఫండ్‌- అనే ఈ పథకం ఎన్‌ఎఫ్‌ఓ ఈ నెల 20న ముగుస్తుంది. కనీస పెట్టుబడి రూ.5,000. ఇది హైబ్రిడ్‌ పథకం. అటు రుణ పత్రాల్లో, ఇటు ఈక్విటీ షేర్లలో పెట్టుబడి పెట్టి తక్కువ హెచ్చు  తగ్గులతో స్థిరమైన రాబడిని ఆర్జించటం ఈ పథకం ప్రధాన మదుపు వ్యూహం. లాభాలపై ఈక్విటీ తరగతికి వర్తించే మూలధన లాభాల పన్ను వర్తిస్తుంది. ఇప్పటికే పలు మ్యూచువల్‌ ఫండ్‌ సంస్థలు ఈ తరహా పథకాలను అందిస్తున్నాయి. గత కొంతకాలంగా ఈ పథకాలపై ఆకర్షణీయమైన లాభాలు నమోదవుతున్నాయి.

ఐటీ సంస్థల్లో..

నవీ మ్యూచువల్‌ ఫండ్‌ నుంచి నవీ నిఫ్టీ ఐటీ ఇండెక్స్‌ ఫండ్‌ అందుబాటులోకి వచ్చింది. నిఫ్టీ ఐటీ ఇండెక్స్‌ ఈ పథకం పనితీరుకు కొలమానంగా ఉంటుంది. ఎన్‌ఎఫ్‌ఓ ఈ నెల 22న ముగుస్తుంది. కనీస పెట్టుబడి రూ.10. ప్రధానంగా ఐటీ కంపెనీలతో పోర్ట్‌ఫోలియో నిర్మిస్తారు. ఇటీవలి కాలంలో ఐటీ కంపెనీల ఆదాయాలు, లాభాలపై ఒత్తిడి కనిపిస్తున్న విషయం విదితమే. అందువల్ల ఐటీ కంపెనీల షేర్ల ధరలూ ఆకర్షణీయంగా పెరగలేదు. కానీ, ఏఐ/ఎంఎల్‌, డేటా అనలటిక్స్‌ వంటి కొత్త ప్రోగ్రాములతో ఐటీ కంపెనీలు భవిష్యత్తులో మళ్లీ వెలుగులోకి వచ్చే అవకాశం లేకపోలేదు. అందువల్ల దీర్ఘకాలం పాటు కొనసాగే వ్యూహంతో ఉన్న మదుపరులకు ఐటీ రంగంలో పెట్టుబడులకు ఇది మంచి తరుణమే.