స్టాక్‌ మార్కెట్‌ హెచ్చుతగ్గుల్లో అప్రమత్తంగా

స్టాక్‌ మార్కెట్‌ అంటేనే అనిశ్చితికి మారు పేరు. చిన్న వార్త వచ్చినా దానికి ప్రతికూలంగానో, అనుకూలంగానో స్పందిస్తుంటాయి. ఒక్క రోజులోనే మదుపరుల సంపద కొన్ని లక్షల కోట్ల రూపాయలు ఆవిరవుతుంది. కొన్ని రోజులకు మళ్లీ గరిష్ఠ స్థాయికి చేరుకుంటుంది. మరోవైపు మధ్య, చిన్న స్థాయి షేర్ల ధరలు బుడగల్లా పెరుగుతూ వస్తున్నాయని, ఇవి ఏమాత్రం సహేతుకంగా కనిపించడం లేదని మార్కెట్‌ నియంత్రణ సంస్థ సెబీ అభిప్రాయం వ్యక్తం చేసింది. చిన్న మదుపరులు పెట్టుబడులు పెట్టే ముందు కాస్త అప్రమత్తంగా ఉండాలని
సూచిస్తోంది. ఈ నేపథ్యంలో పెట్టుబడుల విషయంలో అనుసరించాల్సిన వ్యూహాలేమిటో చూద్దాం.  

అస్థిరమైన మార్కెట్‌లో ఎన్నో భయాందోళనలు ఉంటాయి. వదంతులు వస్తుంటాయి. వీటన్నింటి ఆధారంగా మీ పెట్టుబడి నిర్ణయం తీసుకోవడం మంచిది కాదు. ఆందోళనలకు గురిచేసే విశ్లేషణలు, సలహాలతో చాలామంది తమ పెట్టుబడులను వెనక్కి తీసుకోవడం, నష్టపోవడం చూస్తూనే ఉంటాం. మార్కెట్లు తిరిగి కోలుకున్నప్పుడు రాబడి ఆర్జించే అవకాశాలు కోల్పోతారు. పెరుగుతున్న ద్రవ్యోల్బణం, వడ్డీ రేట్లలాంటివి మీ దగ్గరున్న నగదు నిల్వల విలువను తగ్గిస్తాయి. పెట్టుబడుల రూపంలో ఉన్నప్పుడే మంచి ఫలితాలు రాబట్టుకోగలం. స్టాక్‌ మార్కెట్‌పై ఎన్నో ప్రభావాలుంటాయి. వీటిని ఎవరూ నియంత్రించలేరు అనేది వాస్తవం. పెట్టుబడుల విలువ తగ్గిపోగానే ఆందోళన చెందడం కాదు. మీరు తెలుసుకుంటున్న సమాచారం ఎంత మేరకు సరైనదో చూసుకోండి. మార్కెట్లు పడిపోతున్నప్పుడు పెట్టుబడుల విలువ తగ్గడం సహజమేననే వాస్తవాన్ని అంగీకరించండి. దీనికి తగ్గట్టుగా మీ ప్రణాళికలు ఉండాలి.

దీర్ఘకాలంలో...

పెట్టుబడులు ఎప్పుడూ ఏదో ఒక ఆర్థిక లక్ష్యానికి అనుగుణంగా ఉండాలి. వాటిని సాధించే వరకూ మదుపు సాగుతూనే ఉండాలి. మధ్యలోనే వదిలేయొద్దు. మీరు అయిదేళ్లపాటు మ్యూచువల్‌ ఫండ్లలో మదుపు చేయాలనుకున్నారనుకోండి. ఇంకా ఒకటి రెండు నెలలు మాత్రమే ఉంటే.. మీ పెట్టుబడిని తక్కువ నష్టభయం ఉన్న పథకాల్లోకి మార్చుకునే ప్రయత్నం చేయాలి.  
రెండుమూడేళ్లపాటు వ్యవధి ఉంటే.. అదే పథకంలో కొనసాగిస్తూనే ఉండాలి. మార్కెట్లో ఎంత ఎక్కువ కాలం కొనసాగితే.. నష్టభయం అంత తగ్గుతుంది. సగటు రాబడీ అధికంగా వస్తుంది. క్రమానుగుత పెట్టుబడి విధానం (సిప్‌) మార్గంలో మదుపు చేస్తూ వెళ్లడం ద్వారా మార్కెట్‌ హెచ్చుతగ్గుల్లో సగటు ప్రయోజనాన్ని అందుకోవచ్చు.

వైవిధ్యంగా...

నష్టభయాన్ని పరిమితం చేసుకునేందుకు ప్రయత్నించాలి. పెట్టుబడులు ఒకే చోట కాకుండా.. పలు పథకాలకు కేటాయించాలి. నష్టభయం అధికంగా ఉంటూ, ఎక్కువ రాబడినిచ్చే పథకాల్లో కొంత, సురక్షిత పథకాల్లో కొంత మొత్తం మదుపు చేయాలి. ఈక్విటీ ఆధారిత పెట్టుబడులే కాకుండా, పబ్లిక్‌ ప్రావిడెంట్‌ ఫండ్‌, నేషనల్‌ సేవింగ్స్‌ సర్టిఫికెట్ల వంటి స్థిరాదాయ పథకాలనూ ఎంచుకోవాలి. పెట్టుబడులకు కేటాయించే మొత్తంలో 5-10 శాతం వరకూ పసిడికీ కేటాయించాలి. అప్పుడే అన్ని పెట్టుబడి పథకాలూ మన లక్ష్య సాధనలో తోడుంటాయి.

సమీక్షిస్తూ ఉండాలి..

సంక్షోభాలు వచ్చిన ప్రతిసారీ పెట్టుబడులు సమీక్షించుకునేందుకు మంచి అవకాశం అని చెప్పొచ్చు. కొన్ని షేర్లు, ఫండ్‌ పథకాల్లో ఇలాంటి సందర్భాల్లోనూ మంచి పనితీరు కనిపిస్తుంటుంది. కొన్ని మరీ తీవ్రంగా నష్టపోతాయి. కోలుకునేందుకు చాలా ఏళ్లు పట్టొచ్చు. ఇలాంటి వాటిని వదిలించుకునే ప్రయత్నం చేయొచ్చు. మీ పోర్ట్‌ఫోలియోను ఎప్పటికప్పుడు సమతౌల్యం చేసుకుంటూ ముందుకు వెళ్లాలి. ఎక్కువ నిధులను ఈక్విటీలకు మార్చడం, అలాగే సురక్షిత పథకాలపైనే ఎక్కువగా ఆధారపడటం రెండూ మంచిది కాదు. సమయానుకూలంగా ఏం చేయాలన్నది నిర్ణయించుకొని, ఆ ప్రణాళికలను అమలు చేయాలి.

కొత్త పెట్టుబడులకు అనుకూలం..

మంచి యాజమాన్యం, పనితీరు బాగున్న సంస్థల షేర్లు పతనం సమయంలో అందుబాటు ధరలోకి వస్తాయి. ఇలాంటి వాటిని ఎంచుకొని, దీర్ఘకాలిక దృష్టితో పెట్టుబడులు పెట్టే ప్రయత్నం చేయాలి. మార్కెట్లు మళ్లీ పెరుగుతున్నప్పుడు ఇవి మంచి లాభాలను పంచే అవకాశం లేకపోలేదు. మంచి షేర్లను అవకాశాన్ని బట్టి, సగటూ చేసుకోవచ్చు. నష్టభయాన్ని ఎంత మేరకు భరించగలరో చూసుకోవాలి. అవసరమైతే నిపుణుల సలహా తీసుకోవడం తప్పనిసరి.
స్టాక్‌ మార్కెట్‌పై పూర్తి అవగాహన, ఎప్పటికప్పుడు పరిశీలించే సమయం ఉన్నప్పుడే నేరుగా షేర్లలో పెట్టుబడులు పెట్టాలి. లేకపోతే మ్యూచువల్‌ ఫండ్ల లాంటి ప్రత్యామ్నాయ మార్గాలను ఎంచుకోవాలి.

20 శాతం మించకుండా...

చిన్న, మధ్య తరహా షేర్లు కొంత కాలంగా మంచి రాబడులు అందిస్తున్నాయి. అంతమాత్రాన ఎప్పుడూ ఇదే కొనసాగుతుందని చెప్పలేం. సెబీ హెచ్చరికల నేపథ్యంలో వీటి విషయంలో మదుపరులు మరింత జాగ్రత్తగా ఉండాలి. సాధ్యమైనంత వరకూ లార్జ్‌ క్యాప్‌ షేర్లకు ప్రాధాన్యం ఇవ్వడం మంచిది. మొత్తం పెట్టుబడిలో 15-20 శాతానికి మించి మిడ్‌, స్మాల్‌ క్యాప్‌ షేర్లకు పెట్టుబడిని కేటాయించకూడదు. సాధ్యమైనంత వరకూ షేర్ల ఎంపికలో వైవిధ్యం ఉండేలా చూసుకోవాలి.