YouTube: క్రియేటర్లకు యూట్యూబ్‌ గుడ్‌న్యూస్‌.. వీడియో ఎడిటింగ్‌కు ఫ్రీ యాప్‌

ఇంటర్నెట్‌డెస్క్‌: ప్రముఖ వీడియో స్ట్రీమింగ్‌ ప్లాట్‌ఫామ్‌ యూట్యూబ్‌ (YouTube) వీడియో క్రియేటర్లకు గుడ్‌న్యూస్‌ చెప్పింది. వీడియోలను సులువుగా రూపొందించుకునేలా ‘యూట్యూబ్‌ క్రియేట్‌’ పేరిట కొత్త యాప్‌ను తీసుకొస్తున్నట్లు ప్రకటించింది. అలాగే ఆర్టిఫీషియల్‌ ఇంటెలిజెన్స్‌ (AI) ఆధారంగా రూపొందించిన డ్రీమ్‌ స్క్రీన్‌ (Dream Screen) ఫీచర్‌ను కూడా టెస్ట్‌ చేస్తున్నట్లు ప్రకటించింది. దీని సాయంతో షార్ట్‌ వీడియోలకు (Shorts) ఏఐ ఆధారంగా రూపొందించిన వీడియోలు, బ్యాక్‌గ్రౌండ్‌లో ఇమేజ్‌లు జోడించటానికి వీలుంటుంది.

‘మేడ్ ఆన్ యూట్యూబ్’ పేరిట గూగుల్‌ గురువారం ఓ ఈవెంట్‌ నిర్వహించింది. ఈ సందర్భంగా యూట్యూబ్‌ క్రియేట్‌ (YouTube Create) యాప్‌ను, డ్రీమ్‌ స్క్రీన్‌ గురించి యూట్యూబ్‌ ప్రకటించింది. కొత్త జనరేటివ్ ఏఐ ఆధారిత యాప్‌లో ఎడిటింగ్ ట్రిమ్మింగ్, ఆటోమేటిక్ క్యాప్షనింగ్, వాయిస్‌ ఓవర్, ట్రాన్సిషన్స్ వంటి ఫీచర్లు ఉంటాయి. టిక్‌టాక్ మాదిరిగానే బీట్-మ్యాచింగ్ టెక్నాలజీతో ఉండే రాయల్టీ ఫ్రీ మ్యూజిక్‌ను వినియోగదారులు వాడుకోవచ్చు.

కెనడాలో ‘మహీంద్రా’ అనుబంధ సంస్థ మూత!

‘క్రియేటివ్‌గా వీడియోలు రూపొందించటం చాలా కష్టమని మాకు తెలుసు. అందులోనూ మెదటిసారి వీడియోను అప్‌లోడ్‌ చేయాలంటే చాలా శ్రమించాల్సి ఉంటుంది. ఈ ప్రక్రియను సులభతరం చేయడానికి, అలాగే ఎవరైనా వీడియోలను క్రియేట్‌ చేయాలన్నా, షేర్‌ చేయాలన్నా సులువుగా ఉండేందుకు ఈ అప్లికేషన్‌ను అభివృద్ధి చేశాం. షార్ట్‌, లాంగ్‌ వీడియోలను రూపొందించడానికి దీన్ని తీసుకొచ్చాం’ అని యూట్యూబ్‌ కమ్యూనిటీ ప్రోడక్ట్స్‌ వైస్‌ ప్రెసిడెంట్‌ టోనీ తెలిపారు. ఇదో ఫ్రీ యాప్‌. ప్రస్తుతం భారతదేశం, అమెరికా, జర్మనీ, ఫ్రాన్స్, బ్రిటన్‌, ఇండోనేషియా, కొరియా, సింగపూర్‌తో సహా ఎంపిక చేసిన మార్కెట్‌లలో ఆండ్రాయిడ్‌లో బీటా యూజర్లకు అందుబాటులోకి వచ్చింది. వచ్చే ఏడాది ఐఫోన్‌లో ఈ యాప్‌ను ప్రవేశపెడతామని యూట్యూబ్‌ తెలిపింది.