Breaking | Feedback | ePratibha | E-PAPER | Pratibha

5 సార్లు విఫలమైనా నాన్న కల నెరవేర్చింది...

వ్యవసాయం, పిల్లల చదువుల కోసం చేసిన అప్పులు తీర్చలేక ప్రాణాలు తీసుకున్నాడామె తండ్రి. ఆయన మృతి ఆమెకో ఆశయాన్ని తెచ్చింది. తాను కలెక్టరై, తండ్రి లక్ష్యాన్ని నెరవేర్చి, అలాంటి మరెందరో రైతులకు సేవలందించాలనుకుందామె. అయిదేళ్లకుపైగా అహోరాత్రులూ కష్టపడింది.

Updated : 09 Jun 2022 23:38 IST

ఇంజినీరింగ్‌ చేసి చిన్న ఉద్యోగాన్ని సంపాదించి అమ్మానాన్నకు చేయూతగా ఉండాలనేదే ఆమె కల. నెలకు రూ.15 వేలు జీతమైతే చాలు అనుకుంది. అయితే జీవితం ఆమెకు మరో మార్గాన్ని నిర్దేశించింది. కర్నాటక తుమ్కూరు జిల్లాకు చెందిన అరుణది రైతు కుటుంబం. ఉన్నకొద్ది పొలాన్ని చూసుకుంటూ... అయిదుగురు పిల్లలను పెద్దచదువులు చదివించాలనుకున్నాడా నాన్న. తన పిల్లలందరినీ కలెక్టర్లుగా చూడాలని అనుకునేవాడు. రైతు కుటుంబం నుంచి వచ్చే కలెక్టర్లకే రైతుల కష్టాలు తెలుస్తాయనే వాడు. ఎంత శ్రమ పడైనా సరే కలెక్టరు కావడానికి కృషి చేయమని చెప్పేవాడు. అలా అరుణ ఇంజినీరింగ్‌లో చేరింది. అలు వ్యవసాయం, ఇటు పిల్లల చదువులు ఆగకూడదంటూ అప్పులు చేసేవాడా తండ్రి. అనుకున్నట్లుగా పంట పండితే అప్పులు తీర్చేద్దామన్నది ఆయన ఆలోచన. అయితే అనుకున్నట్లుగా పంట రాకపోవడం, అప్పులు పెరిగి పోవడం ఆయన్ని ఆందోళనకు గురి చేశాయి. అప్పుల భారం మోయలేక చివరకు 2009లో ఆత్మహత్యకు పాల్పడ్డాడు. తండ్రి మరణం అరుణను తీవ్ర కుంగుబాటుకు గురిచేసింది. అయిదుగురిలో తను మూడో సంతానం. తనతోపాటు మిగతా ఇద్దరూ విద్యార్థి దశలోనే ఉన్నారు. అరుణ అక్కలిద్దరూ చదువు పూర్తయి చిన్న చిన్న ఉద్యోగాల్లో ఉన్నారు. నాన్న లేకపోవడంతో ఆ బాధ్యతలను తాము తీసుకుంటామని, మిగతా వారిని చదువు కొనసాగించమని చెప్పారు. యూపీఎస్‌సీ పరీక్షకు హాజరై, ర్యాంకు సాధించి నాన్న కోరిక తీర్చమని అరుణను ప్రోత్సహించారు.

ఆరోసారి...

ఇంజినీరింగ్‌ పూర్తయ్యాక 2014 నుంచి సివిల్స్‌ ప్రయత్నాలు ప్రారంభించింది అరుణ. ‘ఏటా రాయడం, ఉత్తీర్ణత పొందలేక పోవడం. అయినా సాధించాలనే ఆశయం మాత్రం నన్ను వదల్లేదు. అలా పరీక్షలు రాస్తూనే బెంగళూరులో ‘అరుణ అకాడమీ’ని స్థాపించా. గ్రామీణ ప్రాంతాల్లో యూపీఎస్‌సీ రాయాలనే ఆసక్తి ఉన్నవారి కోసం ఇది ప్రారంభించా. ఓవైపు నేను పరీక్షలకు సిద్ధపడుతూనే, ఆసక్తి ఉన్నవారికీ శిక్షణనిచ్చేదాన్ని. అలా 5సార్లు రాసినా ఫలితాన్ని సాధించలేకపోయా. చివరకు ఆరోసారి విజయాన్ని అందుకున్నా. ఈసారి ఫలితాలను చూడటానికి భయపడ్డా. వరుస వైఫల్యాలు భయపెట్టాయి. ఇక నాన్న అనుకున్నట్లుగా కలెక్టరు కాలేనేమో అనిపించింది. అయితే ఇప్పుడు 308వ ర్యాంకు సాధించడం సంతోషంగా ఉంది. గ్రామాల నుంచి వచ్చే పేద విద్యార్థులకు ఉచితంగా శిక్షణనిచ్చే నేను, ఇప్పుడు నాన్న కల కూడా నెరవేర్చగలిగా. ఇప్పుడు ఆయన ఆశయం నిజం కాబోతోంది. నాన్నకు నా విజయాన్ని అంకితమిస్తున్నా. రైతులకు చేయూతగా ఉండే సమాజాన్ని రూపొందించాలనే ఆయన ఆశయాన్ని నెరవేర్చడానికి కృషి చేస్తా’ అని చెప్పుకొస్తున్న అరుణ రైతుల జీవితాల్లో వెలుగులు నింపాలని ఆశిద్దాం.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.