Published : 28/09/2021 01:07 IST

పిల్లలు ఫోన్‌ వదలడం లేదా?

మూడేళ్ల పిల్లల దగ్గర్నుంచీ ముప్పయ్యేళ్ల అమ్మాయిల దాకా టీవీ, ఫోన్‌లకు అతుక్కుపోతున్నారనేది మనందరికీ తెలిసిన సంగతే. చిన్నారులైతే చదువుకు ఆటంకం కలుగుతుందని, ఎదిగిన పిల్లలయితే వృత్తి ఉద్యోగాల్లో పైకి రాలేరని అమ్మలందరి బాధా భయమూ.. ఈ నేపథ్యంలో తల్లిదండ్రులు కొన్ని నియమాలు పెట్టి కొంత కఠినంగా వ్యవహరించక తప్పదంటున్నారు మానసిక నిపుణులు.

పిల్లల ఫోనుల్లో వాట్సాప్‌, ఫేస్‌బుక్‌, ట్విటర్‌ అకౌంట్లను అన్‌ ఇన్‌స్టాల్‌ చేయండి. లేదా నెట్‌ యాక్సెస్‌ లేకుండా చేయండి. అదనపు ఫీచర్లను బ్లాక్‌ చేయండి. అనవసర యాప్స్‌ను తొలగించేయండి.

అత్యవసర మాటలూ మెసేజీలకే ఫోన్‌ పరిమితమని కచ్చితంగా చెప్పండి. మొబైల్‌ను ఆడియో బుక్స్‌, వీడియో స్టోరీస్‌ లాంటి మెదడును వికసింపచేసే అంశాలకు వినియోగించేలా చూడండి.

వీడియో గేమ్స్‌ లాంటివి కూడా రోజులో కొద్దిసేపేనని నిబంధన పెట్టండి. కేటాయించిన సమయానికి మించి స్క్రీన్‌ టైం ఉంటే అడిగిన దుస్తులు లేదా వస్తువులు కొనివ్వమంటూ గట్టిగా ఆంక్షలు పెట్టండి.

మొబైల్‌కి అలవాటు పడితే కళ్లకి ఇబ్బందే కాదు మానసిక అనారోగ్యాలూ వస్తున్నాయని, చాటింగులూ షేరింగుల వల్ల కాలం చాలా వృథా అవుతుందని, గడిచిన క్షణం కూడా వెనక్కి రాదని విడమర్చి చెప్పండి. ఏదైనా ఉదాహరణలతో చెబితే బాగా అర్థమవుతుంది.

అరచేతిలో ప్రపంచాన్ని చూపే ఫోన్‌లో విజ్ఞాన వినోదాలతో బాటు వికారాలూ వైపరీత్యాలూ అపారమని వివరంగా చెప్పండి.  

పిల్లలకు ఈ మాత్రం జాగ్రత్తలు చెప్పకపోతే వాళ్లు గాడి తప్పిన తర్వాత బాధపడి ప్రయోజనం ఉండదని హెచ్చరిస్తున్నారు సైకాలజిస్టులు.


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని