close
Published : 20/01/2022 01:02 IST

అతిగా కొనట్లేదు కదా!

రాయితీలు, సులువైన చెల్లింపులు, కూర్చున్న చోటి నుంచే షాపింగ్‌ అవకాశం వెరసి.. ఆన్‌లైన్‌ కొనుగోళ్లు పెరుగుతున్నాయి. దీనికి మూడో ఉద్ధృతి తోడైంది. దీంతో చాలామంది మహిళల ప్రధాన వ్యాపకం షాపింగే అవుతోందట! మరి.. అన్నీ అవసరమైనవే కొంటున్నారా? చెక్‌ చేసుకోండి.

అంతర్జాలంలో వార్తల నుంచి వస్తువు వరకు దేనికోసం చూసినా కింద ప్రకటనల రూపంలో కళ్లు చెదిరే రాయితీలు. ‘అరె.. చాలా తక్కువ’ అనేసుకుని కొంటుంటాం. తక్కువ సరే! అవసరమా అనేదీ ఆలోచించుకోండి. దేన్నైనా కొనేముందు.. ‘కావాలి అనిపిస్తోందా? కచ్చితంగా కావాలా?’ అని ప్రశ్నించుకోండి. అలాగే ఆదాయం, ఇతర అవసరాలనూ పరిశీలించుకోండి. ఆ తర్వాతే నిర్ణయం తీసుకోండి.

కొందరు ఇంట్లోని వస్తువులు, వ్యాయామానికి సంబంధించిన వాటిని ఇతరులను చూసి కొనేస్తుంటారు. తీరా కొన్నిరోజులు వాడాక పక్కన పెట్టేస్తుంటారు. అదీ వృథానే. ఇది తప్పాలంటే ముందు నచ్చినవాటిని నేరుగా కొనేయకండి. కార్ట్‌లోకి కొట్టి ఉంచండి. కాస్త ప్రశాంతంగా ఉన్నప్పుడు తిరిగి చూడండి. ఆ తర్వాతా కొనాలనిపిస్తే తీసేసుకోండి. కొన్నిసార్లు చేతిలో డబ్బులు లేకపోయినా.. కొందరు నియంత్రించుకోలేరు. అలాంటప్పుడు క్రెడిట్‌ కార్డులను పక్కనపెట్టేయండి. అవసరాలు, కావాల్సినవి, పొదుపు.. మూడు రకాలుగా బడ్జెట్‌ నిర్ణయించుకోవాలి. ఎంత కష్టమైనా దాన్ని పాటించేలా చూసుకోండి. ఫోన్‌ నుంచి అతిగా ఉన్న ఈ-కామర్స్‌ ఆప్‌లనూ తొలగించండి. ఒత్తిడి వల్ల కూడా కొనేస్తుంటారు కొందరు. అదీ కారణమేమో ఒకసారి సమీక్షించుకోండి.


Advertisement

మరిన్ని