వీటికి దూరంగా.. సంతోషానికి దగ్గరగా..!

కష్టాలు.. కన్నీళ్లు.. సమస్యలు.. ఇవేవీ లేకుండా జీవితమంతా సుఖంగా, సంతోషంగా ఉండాలని ఎవరు కోరుకోరు చెప్పండి? కానీ ఒక్కోసారి అదుపు తప్పిన మనసులో కలిగే భావనల వల్ల ఉన్న ఆనందం కాస్తా ఆవిరైపోతుంది. ఫలితంగా మానసిక ఒత్తిడి ఎదురై జీవితంపై విరక్తి చెందే సందర్భాలు కూడా లేకపోలేవు. అందుకే సంతోషాన్ని మన నుంచి దూరం చేసే కొన్నింటికి మనం ఎంత దూరంగా ఉంటే అంత మంచిది. ఈ క్రమంలో- అసలు సంతోషం దూరం కావడానికి తోడ్పడే అంశాలు ఏంటి? వేటిని దూరం చేసుకుంటే సంతోషం మనకు దగ్గరవుతుందో తెలుసుకుందామా..!

పగ పెంచుకోవద్దు!

కొన్ని కొన్ని విషయాల్లో పెద్దవాళ్లు పిల్లల మంచి కోరే కొన్ని సలహాలు ఇచ్చినా.. అవి వాళ్లకు రుచించకపోవచ్చు. ఈ క్రమంలో కొంతమంది ‘నువ్వేంటి నాకు చెప్పేది ’అన్నట్లుగా వారిపై పగ, ద్వేషం పెంచుకుంటుంటారు. దీనివల్ల మనకు ఒరిగేది ఏమీ ఉండకపోగా.. ఉన్న సంతోషం కూడా ఆవిరైపోతుంది. అందుకే మనసు, మెదడును ఎప్పుడూ ప్రశాంతంగా ఉంచుకోవాలి. అప్పుడు ఆనందం కూడా మీ వద్దే ఉంటుంది. అంటే 'మీ ప్రశాంతతే మీకు శ్రీరామ రక్ష' అన్నమాట!

అసూయకు ఆమడ దూరంలో..

సంతోషాన్ని దూరం చేసే అంశాల్లో అసూయ చాలా కీలకమైంది. ఇది పైకి కనిపించకపోయినా.. మన ప్రవర్తన, మాటతీరు బట్టి వ్యక్తమవుతూ ఉంటుంది. ఉదాహరణకు.. మీ ప్రాణ స్నేహితురాలు, మీరు మంచి ప్రభుత్వ ఉద్యోగం కోసం ఒకేసారి పరీక్ష రాశారనుకోండి. ఈ పరీక్షలో మీ స్నేహితురాలు ఉత్తీర్ణత సాధించి, మంచి హోదా కలిగిన ఉద్యోగం వచ్చింది. మీకు రాలేదనుకుందాం.. ఇలాంటి పరిస్థితుల్లో ''తర్వాత పరీక్షల్లో నేను కూడా సాధించాలి అని అనుకోవాలి కానీ నాకు రాని ఉద్యోగం తనకు వచ్చిందంటూ'' ఆమెపై కారాలు, మిరియాలు నూరుతూ అసూయను పెంచుకోకూడదు. దీని వల్ల మన మానసిక ప్రశాంతతకే భంగం వాటిల్లుతుంది. అంటే ఇలాంటి ప్రతికూల ఆలోచనల వల్ల కూడా సంతోషం మనకు దూరం కావడానికి అవకాశం ఉంటుంది.

భయం, ఆందోళన..

మనసును కుంగదీసి, ఆనందాన్ని పోగొట్టే అంశాల్లో భయం, ఆందోళన కూడా ముఖ్యమైనవే. చిన్న విషయాలకే భయపడిపోవడం, జరగాల్సిన పనులు సక్రమంగా జరగవేమోనని లేదా అసలు జరగవని అనవసరంగా ఆందోళన చెందడం.. ఇలా ఉన్న సమయమంతా భయపడుతూ కూర్చుంటే.. ఇక సంతోషంగా ఉండటానికైనా, గడపడానికైనా సమయం ఎక్కడిది? ఇలాంటి భావనలు మనసులో చేరడం వల్ల మన మీద మనకుండే నమ్మకాన్ని కోల్పోతాం. అందుకే ఎలాంటి సందర్భాలు ఎదురైనా ధైర్యంగా ఎదుర్కొనే మనస్తత్వం అలవరచుకోవడం మంచిది. దీంతో సానుకూల దృక్పథం, ఆనందం రెండూ మీ సొంతమవుతాయి.

విచారమా??

కొంతమంది ఎప్పుడు చూసినా విచారంగా, ఏదో కోల్పోయినట్లు కనిపిస్తారు. ప్రతి విషయానికీ ముభావంగా, చాలా డల్‌గా సమాధానమిస్తూ ఉంటారు. అలాగే సున్నిత మనస్కులు కూడా ఏ చిన్న విషయం గురించైనా కలత చెందుతూ ఉంటారు. ఎవరితోనైనా గొడవ పడినప్పుడు ఆవేశంతో ఒకరినొకరు తిట్టుకోవడం సహజం. అయితే కొందరు ఎప్పటి సంఘటనలను అప్పుడే వదిలేస్తారు. కానీ మరికొందరు మాత్రం వాటినే మళ్లీ మళ్లీ తలుచుకుని తెగ బాధపడిపోతూ ఉంటారు. ఇలా అనిపించినప్పుడు బాధపడుతూ కూర్చోడం వల్ల ఎలాంటి ప్రయోజనం ఉండదు. వెంటనే వాళ్ల దగ్గరకు వెళ్లి క్షమాపణ కోరితే మనసుకు చాలా ప్రశాంతంగా ఉంటుంది. ఫలితంగా మీరు కూడా సంతోషంగా ఉంటారు.

భారీ అంచనాలు..

కొంతమంది పరిస్థితులు, సందర్భాల గురించి పట్టించుకోకుండా.. భవిష్యత్తుకు సంబంధించి లేదా వ్యక్తులకు సంబంధించి ఏవేవో అతిగా వూహించేసుకుంటూ ఉంటారు. ఇలా భారీ స్థాయిలో అంచనాలు పెట్టుకున్నప్పుడు అవి నెరవేరకపోతే చాలా బాధపడుతూ ఉంటారు. అందుకే ప్రస్తుత పరిస్థితులను దృష్టిలో ఉంచుకొని చిన్న చిన్న లక్ష్యాలను ఏర్పరచుకొని వాటిని చేరుకోవడానికి ప్రయత్నించాలి. మనం కోరుకుని, ఇష్టపడి చేసిన పనిలో విజయం సాధిస్తే ఆ సంతోషానికి అంతేముంటుంది చెప్పండి!

ఇతరులపై ఆధారపడడం..

ప్రతి ఒక్కరూ స్వతంత్రంగా జీవించాలని అనుకుంటారు. కానీ కొన్ని ప్రతికూల పరిస్థితుల వల్ల ఇతరులపై ఆధారపడాల్సి రావచ్చు. ఈ క్రమంలో మీ నిస్సహాయతను బయటపెట్టకుండా స్వతంత్రంగా నిలదొక్కుకునే ప్రయత్నాలు చేయాలి. తద్వారా తప్పక ఫలితం ఉంటుంది. అలాగే ఈ క్రమంలో మీలో ఆత్మవిశ్వాసం రెట్టింపై ప్రశాంతంగా, ఆనందంగా ఉండగలుగుతారు కూడా!

నిజాయతీ లేకపోవడం..

'ఒక్క అబద్ధమాడితే దాన్ని కప్పిపుచ్చుకోవడానికి వంద అబద్ధాలాడినా సరిపోదు..' అంటారు పెద్దలు. ఈ క్రమంలో- తెలిసో, తెలియకో, కావాలనో.. పొరపాటునో.. ఏదో ఒక సందర్భంలో అబద్ధం చెప్పే ఉంటారు. అయితే నిజాయతీగా వ్యవహరించడం చాలా మంచి లక్షణం. అలా నిజాయతీగా ఉండే వారిలో ఆత్మవిశ్వాసం పెరిగి సంతోషంగా ఉండగలుగుతారని చెబుతున్నారు నిపుణులు. కాబట్టి ఎప్పుడూ సత్యమే పలకమంటున్నారు.

నిస్వార్థంగా..!

ఇతరులకు ఉపకారం చేసినప్పుడే మనకు కూడా తృప్తిగా ఉంటుంది. ప్రతి విషయంలో నేను, నా అంటూ స్వార్థంగా ఆలోచిస్తే ఈ లోకంలో మనకి మనం తప్ప ఎవరూ ఉండరు. అందుకే స్వార్థాన్ని పక్కన పెట్టి అందరితోనూ కలిసి మెలసి ఉంటూ వీలైనంత వరకు ఇతరులకు సహాయం చేయడానికి ప్రయత్నించాలి. అప్పుడే మనసుకు ప్రశాంతత, తృప్తి.. రెండూ సొంతమవుతాయి.