Updated : 07/09/2021 05:27 IST

సంతోషాలకు సప్తపది!

భార్యాభర్తలు పాలూ నీళ్లలా కలిసిపోవాలి. ఒకరి నొకరు అర్థం చేసుకోవాలి. ఎదుటి వారిని గౌరవించాలి. చెప్పేది పూర్తిగా వినాలి. అప్పుడే కాపురం కలతలు లేకుండా సాగుతుంది. అందమైన బంధంలోకి అడుగుపెట్టిన జంటకు మరికొన్ని మార్గదర్శకాలు...

1 మీరు ఎంత బిజీగా ఉన్నా ఒకరికొకరు సమయాన్ని కేటాయించుకోవాలి. రోజులో కొన్ని పనులు కలిసి చేసే, కలిసి ఉండేలా ప్లాన్‌ చేసుకోవాలి. అప్పుడే జీవితం ఆనందమయం అవుతుంది.

2 వీలైనంతవరకూ రోజులో ఎక్కువసార్లు భాగస్వామికి మీ ప్రేమను చేతల్లో చూపండి. పనుల్లో సాయం చేయడం, ఇద్దరూ పనులు పంచుకోవడం, తనకిష్టమైనవి చేయడం... లాంటివన్న మాట.

3 మీ భావాలను ఎదుటివారితో పంచుకోవాలి. సంతోషం, దుఃఖం, బాధ... ఇలా ప్రతిదీ షేర్‌ చేసుకోవాలి.

4  ఒకరికోసం మరొకరు అన్నట్లుగా ఉండాలి.  ఎదుటివారి కోసం కొన్ని వదులుకోవడానికి, మరికొన్ని నేర్చుకోవడానికి, తెలుసుకోవడానికి సిద్ధంగా ఉండాలి.

5  భాగస్వామిపై చెప్పలేనంత ప్రేమ ఉన్నా తనకంటూ కొంత సమయం/స్పేస్‌ను ఇవ్వాలి. ఆలుమగలన్నాక అప్పుడప్పుడు చిరు గొడవలు సహజమే... అయితే వాటిని చిన్నగా ఉన్నప్పుడే పరిష్కరించుకోవాలి. అంతే తప్ప మేమే గొప్ప అనే అహాన్ని ఇరువురూ ప్రదర్శించకూడదు. ఇలా చేస్తే సున్నితమైన మీ బంధం క్రమంగా బలహీనపడే ప్రమాదం ఉంది.

6  ఇతరులతో ఎప్పుడూ పోల్చొద్దు. ఉన్నంతలో సంతోషంగా, కలహాలు, కలతలు లేకుండా ఉండేందుకు ఇద్దరూ కృషి చేయాలి.

7  భాగస్వామి కోసం అప్పుడప్పుడు సర్‌ప్రైజ్‌లను ప్లాన్‌ చేయాలి. ఆ సమయంలో ఎదుటి వారి కళ్లలోని ఆశ్చర్యానందాలను మీరెప్పటికీ మరిచిపోలేరు.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని