Updated : 31/03/2022 02:05 IST

కొన్ని త్యాగాలతో కొండంత అనురాగం

ధర్మేచ.. అర్థేచ.. మోక్షేచ.. నాతి చరామి.. అనేది పెళ్లి మంత్రం. అలా గ్రాంథిక భాషలో కాకున్నా ‘ఇద్దరూ కలకాలం కలిసుండండి, సంతోషంగా గడపండి’ అని పెద్దలంతా ఆశీర్వదిస్తారు. ఆ దీవెనలు నిజమవ్వాలంటే జంటలు కొన్ని బాధ్యతలు నెరవేర్చాలి. చిన్న చిన్న త్యాగాలు చేయాలి. అవేం కష్టమైనవి కాదు.. ఒకరకంగా ప్రేమను వ్యక్తం చేయడానికి దొరికిన అవకాశాలు. ఇంతకీ అవేంటంటే...

* ఏ పనీ మొక్కుబడిగా చేయొద్దు. మీరు చేసేది ఇష్టంగా, వంక పెట్టలేని విధంగా ఉండాలి. అది మీ మీద ప్రేమని, గౌరవాన్ని పెంచుతుంది.  మీకు ఇష్టమైన రంగు మీ భాగస్వామికి నచ్చదనుకోండి.. ఆ రంగు దుస్తుల జోలికి వెళ్లొద్దు. మొదట్లో కాస్త బాధ కలగొచ్చు. కానీ త్వరగానే అలవాటైపోతుంది. మీరు తనకోసం వదులుకున్నట్లు తెలిసి ఆ వ్యక్తి మురిసిపోవడమే కాదు, తన అభిరుచిని మార్చుకోవడమూ కద్దు.

* తలనొప్పి, కాళ్లనొప్పి లాంటి అనారోగ్యాలు చాలా సహజం. అందుకు టాబ్లెట్‌ ఇచ్చి ఊరుకునే కంటే కాసేపు తల మర్దనా చేయడం, కాళ్లు నొక్కడం లాంటి సేవ చేస్తే మీ మీద ప్రేమ రెట్టింపవుతుంది. ఆ ఉల్లాసంతో అనారోగ్యం హుష్‌ కాకీ అయిపోయి కృతజ్ఞతా భావం నిలిచిపోతుంది.

* ఫోన్‌లో మునిగిపోయి భాగస్వామిని పట్టించుకోకపోతే కోపతాపాలు వచ్చే అవకాశముంది. కనుక కాలక్షేపాల కంటే బాంధవ్యం ముఖ్యమని మర్చిపోవద్దు.

* పుట్టినరోజు, పదోన్నతి లాంటి సందర్భాల్లో తోచిన కానుక ఇచ్చి ఇంట్లో వేడుక చేయండి. ఆ గుర్తింపూ గౌరవం మధుర స్మృతులను అందించి, ఆత్మీయత తిరుగుటపాలో వస్తుంది.  

* ఎంత ప్రేమగా మెలిగినా ఏదో విషయంలో పేచీలు తప్పవు. అలాంటప్పుడు ఒకరు సర్దుకుపోతే సరిపోతుంది. లేదంటే చిలికి చిలికి గాలివాన అవుతుంది. కోపం తగ్గాక మీ అభిప్రాయం స్థిరంగానే చెప్పొచ్చు.

* చెప్పిన మాట వినకపోవడం, వద్దన్న వస్తువు కొనుక్కురావడం.. లాంటి విషయాల్లో ఆవేశం కలిగే మాట నిజమే. కానీ ఆ కోపాన్ని కాస్త నిగ్రహించుకుని మీకు వాటి పట్ల ఎందుకు విముఖతతో, వాటిల్లబోయే నష్టాలేమిటో శాంతంగా చెప్పి చూడండి... అవతలి వ్యక్తిలో పంతాలూ పట్టింపులకు బదులు సానుకూల ప్రతిస్పందన కనిపిస్తుంది. ఇంకోసారి మీకు ఇష్టం లేని అంశాలు చోటుచేసుకోవు.

ఈ సూత్రాలు భార్యాభర్తల్లో ఎవరో ఒకరు కాదు.. ఇద్దరికిద్దరూ పాటించాల్సినవి. అప్పుడే ఆ సంసారం మూడు పూవులూ ఆరు కాయలుగా సాగుతుంది.


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని