పెట్టుడు కాలే.. అయినా ఆగని పరుగు! 

(Photo: Guinness world records)

‘పెద్దయ్యాక ఏదేదో కావాలని చిన్నప్పుడు కలలు కంటాం.. వాటిని చేరుకునే క్రమంలో ఎదురయ్యే సవాళ్లను ధైర్యంగా ఎదుర్కోవడమే అసలైన జీవితం’ అంటున్నారు అమెరికాకు చెందిన అమీ పాల్మెరో వింటర్స్. చిన్నతనంలో కారు ప్రమాదంలో తన ఎడమ కాలిని పోగొట్టుకున్న ఆమె.. ‘నా తలరాత ఇంతే!’ అని బాధపడలేదు. పడిలేచిన కెరటంలా పరుగును తన ఆరో ప్రాణంగా మార్చుకుంది. పెట్టుడు కాలితోనే పలు మారథాన్‌లలో పాల్గొని పదికి పైగా ప్రపంచ రికార్డులు తన పేరిట లిఖించుకుంది. ఇప్పుడు అదే పరుగుతో గిన్నిస్‌ వరల్డ్‌ రికార్డ్‌ సాధించి అవయవ లోపం విజయానికి అడ్డు కాదని నిరూపించింది. ఆమె గెలుపు కథే ఇది!

పెన్సిల్వేనియాలోని మెడ్‌విల్లేలో 1972లో జన్మించింది అమీ. చిన్నతనం నుంచి పరుగునే తన ఆరో ప్రాణంగా భావించిన ఆమె.. పెరిగి పెద్దయ్యే కొద్దీ అందులోనే ఆరితేరింది. యుక్త వయసు నుంచే పలు పరుగు పోటీల్లో పాల్గొన్న ఆమెకు తన 22 ఏళ్ల వయసులో అనుకోని ప్రమాదం ఎదురైంది. బైక్‌పై వెళ్తున్న తనను కారు వేగంగా ఢీకొట్టడంతో తన ఎడమ కాలు నుజ్జునుజ్జయింది. మోకాలి కింది భాగాన్ని పూర్తిగా కోల్పోయిన ఆమె.. మూడేళ్ల పాటు మంచానికే పరిమితమైంది.

పరిగెత్తలేవన్నారు!

సాఫీగా, మనం అనుకున్నట్లుగా సాగితే అది జీవితం ఎందుకవుతుందంటోంది అమీ. ‘బాల్యంలో ఉన్నప్పుడు మన ముందు ఎన్నో ఆప్షన్లుంటాయి. పోలీసాఫీసర్‌ కావాలని, మిలిటరీలో చేరాలని, ఒలింపియన్‌గా పేరు తెచ్చుకోవాలని, గిన్నిస్‌ రికార్డు సాధించాలని.. ఇలా ఒక్కొక్కరూ ఒక్కో కల గంటారు. అలా నేను పరుగంటే ప్రాణం పెంచుకున్నా. కానీ ఎప్పుడైతే నేను కారు ప్రమాదానికి గురయ్యానో అప్పుడు నా కలలన్నీ ఒక్కసారిగా ఆవిరైపోయాయి.

పరుగుపై నాకున్న తపన చూసి వైద్యులు కూడా నా కాలు తిరిగి తీసుకు రావాలని శతవిధాలా ప్రయత్నించారు. కానీ అదృష్టం కలిసిరాలేదు. ఇక నేను పరిగెత్తలేనని తేల్చి చెప్పారు. అలా మూడేళ్ల పాటు మంచానికే పరిమితమయ్యా. ఈ క్రమంలో 25 పైగా ఆపరేషన్లయ్యాయి. ఫిజికల్‌ థెరపీ, రీహ్యాబిలిటేషన్‌తో పాటు మానసిక ఒత్తిడిని అధిగమించడానికి చికిత్సలు తీసుకున్నా. బహుశా నాలో ఉన్న తపనే తిరిగి నేను నడిచేలా చేసిందేమో అనిపిస్తోంది..’ అంటోంది అమీ.

పెట్టుడు కాలితో ట్రాక్ పైకి..!

ప్రమాదవశాత్తూ ఎడమ కాలిని కోల్పోయిన ఆమె మూడేళ్ల పాటు మంచానికే పరిమితమైనా పడిలేచిన కెరటంలా దూసుకొచ్చింది. తనలో ఉన్న తపనతో తిరిగి నెమ్మదిగా నడవడం మొదలుపెట్టిన అమీ.. ఈ క్రమంలో ప్రోస్థటిక్‌ కాలిని ఎంచుకుంది. పెట్టుడు కాలితోనే మారథాన్స్‌, ట్రయథ్లాన్స్‌, పారా ట్రయథ్లాన్స్‌, అల్ట్రా మారథాన్స్‌, ఐరన్‌మ్యాన్‌ ట్రయథ్లాన్స్‌.. వంటి పోటీల్లో పాల్గొంది.

పదికి పైగా ప్రపంచ రికార్డులు!

అవయవ లోపం తన విజయానికి అడ్డు కాదని తెలుసుకున్న అమీ.. ఆపై తనకు అనువుగా, సౌకర్యవంతంగా ఉండేలా మరో ప్రోస్థటిక్‌ కాలిని తయారుచేయించుకుంది. ఆ కాలిని ధరించే పదికి పైగా ప్రపంచ రికార్డులు తన పేరిట లిఖించుకుందీ అమెరికన్‌ మామ్‌. 2006లో న్యూయార్క్‌ సిటీ మారథాన్‌, చికాగో మారథాన్‌లలో తక్కువ సమయంలో లక్ష్యాన్ని చేరుకొని చరిత్ర సృష్టించిన ఆమె.. అదే సమయంలో అల్ట్రామారథాన్‌లకు ఉన్న డిమాండ్‌ను గ్రహించి తన దృష్టిని అటు వైపు మళ్లించింది.

అలా గిన్నిస్‌కెక్కింది!

2010లో ప్రపంచ ఛాంపియన్‌షిప్స్‌లో 123.99 మైళ్లు పరిగెత్తి మహిళల విభాగంలో 18వ స్థానంలో నిలిచిన అమీ.. అదే ఏడాది ‘వెస్ట్రన్‌ స్టేట్స్ ఎండ్యురన్స్ రన్‌’లో వంద మైళ్ల రన్నింగ్‌ రేస్‌ పూర్తి చేసి.. ఈ ఘనత సాధించిన తొలి యాంప్యూటీగా రికార్డు సృష్టించింది. ‘బ్యాడ్‌వాటర్‌ అల్ట్రా మారథాన్‌’, ‘మారథాన్‌ డెస్‌ సేబుల్స్‌’.. వంటి పోటీల్ని పూర్తిచేసిన తొలి మహిళా యాంప్యూటీగానూ పలు రికార్డులు కైవసం చేసుకుంది.

ఇలా పెట్టుడు కాలితో పరుగులో ఇప్పటికే అనితర సాధ్యమైన రికార్డులు తన పేరిట లిఖించుకున్న అమీ.. ఇటీవలే అత్యుత్తమమైన గిన్నిస్‌ రికార్డును తన ఖాతాలో వేసుకుంది. వంద మైళ్ల (160 కిలోమీటర్ల) దూరాన్ని 21:43:29 గంటల పాటు ట్రెడ్‌మిల్‌పై.. వేగంగా, అదీ ప్రోస్థటిక్‌ కాలితో పరిగెత్తి గిన్నిస్‌ రికార్డు (Impairment Records Initiative విభాగంలో)ను తన వశం చేసుకుంది అమీ. మధ్యమధ్యలో హెల్దీ డ్రింక్స్‌, కార్బోహైడ్రేట్స్‌, ఎనర్జీ బార్స్‌ తీసుకుంటూ శక్తిని కూడగట్టుకుంటూ ముందుకు సాగిందామె. కండరాల నొప్పులు, డీహైడ్రేషన్‌.. వంటి సమస్యలు వేధిస్తున్నా తన పట్టుదలతో వాటన్నింటినీ అధిగమించి తాజాగా గిన్నిస్కెక్కిందీ అమెరికన్‌ అథ్లెట్.

సేవలోనూ మిన్నే!

ప్రమాదం తర్వాత పరుగు ప్రారంభించిన కొన్నేళ్లకు ‘వన్‌ స్టెప్‌ ఎహెడ్‌ ఫౌండేషన్‌’ను స్థాపించిన అమీ.. దీని ద్వారా అవయవ లోపాలున్న చిన్నారులు అథ్లెటిక్స్‌లో రాణించేందుకు కృషి చేస్తోంది. తన ప్రతిభకు గుర్తింపుగా 2010లో ‘జేమ్స్‌ ఇ. సులివన్‌ అవార్డు’, ‘ఈఎస్‌పీవై అవార్డు’.. వంటి ఎన్నో పురస్కారాల్ని సైతం అందుకుందామె.

ప్రస్తుతం ఇద్దరు పిల్లల తల్లైన అమీ.. తన 48వ ఏట తాజాగా సాధించిన గిన్నిస్‌ రికార్డుతో మరోసారి వార్తల్లో నిలిచింది. ‘వయసు విజయానికి అడ్డు కాదు.. అది కేవలం సంఖ్య మాత్రమే!’ అంటూ అందరి చేతా ప్రశంసలందుకుంటోందీ రన్నింగ్‌ క్వీన్.

హ్యాట్సాఫ్‌ అమీ!