Published : 29/03/2023 00:04 IST

నెలసరిలో తీపిపై మనసా?

హార్మోనుల్లో మార్పులు నెలసరిలో తీపి పదార్థాలవైపు మనసు మళ్లేలా చేస్తాయి. తీపి తింటే అనారోగ్యం. మరేం చేయాలంటారా.. చిట్కాలివిగో!

* తీపి తినాలనిపిస్తే గ్లాసు మంచినీటిని తాగేయండి. శరీరం డీహైడ్రేషన్‌కు గురైనప్పుడు కూడా తీపి వైపు ఆలోచన వెళుతుంది. అప్పుడు నీటిని తాగితే ఆలోచన దూరమవుతుంది.

* అరటి, యాపిల్‌, నారింజ వంటి పండ్లలో ఏదైనా ఒకదానిని తీసుకోండి. కడుపూ నిండుతుంది. తీపి తిన్న భావన కూడా!

* ఇటువంటి సందర్భాల్లో ప్రొటీన్లు పుష్కలంగా ఉండే ఆహారానికి ప్రాధాన్యమివ్వాలి. చికెన్‌, చేప, గుడ్లు, పాల ఉత్పత్తులు, ఆకుకూరలు, కిడ్నీ బీన్స్‌, చిక్కుడు వంటివి ఆహారంలో చేర్చుకోండి.

* మనసుకు నచ్చిన స్నేహితులు, శ్రేయోభిలాషులతో కాసేపు మాట్లాడండి. మనసును మరో విషయం వైపు మళ్లేలా చేసినా తీపి ఆలోచన దూరమవుతుంది.

* నిద్రలేమి ఉంటే సరిచేసుకోవాలి. గోరువెచ్చని నీటితో స్నానం చేసి గంటసేపు హాయిగా నిద్రపోయి లేస్తే చాలు. మనసంతా ఉల్లాసంగా అనిపిస్తుంది. తీపి ఆలోచనా ఉండదు.

* కంటికెదురుగా చాక్లెట్లు, స్వీట్లు వంటివి లేకుండా జాగ్రత్తపడాలి. వాటిని చూస్తూ ఉంటే తినాలనే కోరిక పెరుగుతుంది.

* శరీరంలో విటమిన్ల లోపం ఉన్నా తీపి తినాలనిపించే అవకాశాలెక్కువ. వైద్యుల సలహాతో మల్టీ విటమిన్‌ ట్యాబ్లెట్‌ వేసుకోవడం మంచిది.

* అల్పాహారానికి, భోజనానికి మధ్య మరీ ఎక్కువ సమయం ఉండొద్దు. కనీసం రెండు మూడు గంటలకు ఒకసారి కొద్ది మొత్తంలో ఎక్కువసార్లు ఆహారం తీసుకోండి. అప్పుడు మాటిమాటికీ ఆకలి వేయదు. తీపి తినాలన్న ఆలోచనా దరి చేరదు.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.