Breaking | Feedback | ePratibha | E-PAPER | Pratibha

శ్రద్ధ చూపాల్సింది మీరే!

Updated : 30 Nov 2021 06:17 IST

భర్త నిండు నూరేళ్లు ఆరోగ్యంగా, ఆనందంగా ఉండాలని ప్రతి భార్యా కోరుకుంటుంది. సమయానికి అన్నీ సమకూర్చడం, చక్కగా వండి పెట్టడం వంటివన్నీ దగ్గరుండి చూసుకుంటుంది. అయినా పెరుగుతున్న వయసు, కొన్ని రకాల ఇన్‌ఫెక్షన్లు అనారోగ్యానికి దారి తీయొచ్చు. అందుకే కొన్ని జాగ్రత్తలు తీసుకోవాలి మరి.

టెన్నిస్‌, బ్యాడ్మింటన్‌, ఏ ఆటైనా ఇద్దరూ కలిసి రోజూ కొద్దిసేపు ఆడండి. ఇది మిమ్మల్ని మానసికంగా, శారీరకంగా ఆరోగ్యంగా ఉంచుతుంది. బరువూ నియంత్రణలో ఉంటుంది. రోగనిరోధక శక్తి పెరిగి జబ్బులు దరి చేరవు. బంధమూ కొత్త మలుపు తీసుకుంటుంది. తీపి పదార్థాలకు బదులుగా పండ్లను అలవాటు చేయండి. చక్కెర స్థానంలో బెల్లం, తేనె, బ్రౌన్‌ షుగర్‌ ఉపయోగించండి.

రోజువారీ ఆహారంలో విటమిన్‌ ఎ, బి12, సి, ఒమేగా-3 ఫ్యాటీ ఆమ్లాలు, ఐరన్‌, యాంటీ ఆక్సిడెంట్లు ఉండే పదార్థాలను తీసుకునేలా చూడండి. ఇవి ఆరోగ్యాన్ని పదిలంగా ఉంచుతాయి. డ్రైఫ్రూట్స్‌, తాజా ఆకుకూరలు, పండ్లు, పండ్లరసాలు, సూప్‌లకు ఎక్కువ ప్రాధాన్యమివ్వండి.

ఏడాదికోసారి పూర్తి ఆరోగ్య పరీక్షలు చేయించుకోవాలి. శ్రీవారికి రాత్రిళ్లు చాలా ఆలస్యంగా నిద్రపోవడం అలవాటా? వచ్చే ఆరోగ్య సమస్యలను వివరించండి. వీలైనంత వరకు ఇంట్లో చేసిన ఆహారానికే ప్రాధాన్యం ఇవ్వండి. జంక్‌ ఫుడ్‌కు దూరంగా ఉండేలా చూడండి. చాలామంది మగవాళ్లు నీళ్లు సరిగా తాగరు. మీవారూ ఆ కోవకే చెందితే రోజులో రెండు మూడు లీటర్ల నీరు తాగేలా గుర్తు చేయండి. ఆ.. ఇదంతా ఓ వయసు వచ్చాక అనుకోకండి. కొత్త దంపతులైనా వీటిని అలవాటు చేసుకోవాల్సిందే, పాటించాల్సిందే. అప్పుడే బంధం ఆరోగ్యంగా సాగగలుగుతుంది.

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.