Updated : 30/11/2022 13:12 IST

బరువు తగ్గాలా.. ఇవి తినండి..

జలుబూ జ్వరాలతో జిహ్వ రుచి కోల్పోయి తినేవేవీ సహించనప్పుడు అల్‌బుకారా బుగ్గన పెట్టుకోవడం మనందరికీ అలవాటే. అరుచిని, వికారాన్నీ పోగొట్టడమే కాదు.. ఈ పండ్లలో మరెన్నో సుగుణాలున్నాయి. ప్లమ్‌ ఫ్రూట్స్‌గా ప్రపంచ ప్రసిద్ధమైన వీటిల్లో రెండువేల రకాలున్నాయనేది నమ్మశక్యం కాని నిజం. ఇంతకీ ఇవి ఎన్ని రకాలుగా మేలు చేస్తాయో చూద్దాం.

* వీటిలో సి- విటమిన్‌ పుష్కలంగా ఉన్నందున కండరాలు, రక్తనాళాలు బలోపేతం అవుతాయి. రోగనిరోధక శక్తి వృద్ధి చెందుతుంది.

* ప్లమ్‌ పండ్లలో పొటాషియం సమృద్ధిగా ఉండటం వల్ల ఇవి తినేవారిలో రక్తం గడ్డ కట్టదు. అధిక రక్తపోటు నియంత్రణలో ఉంటుంది. గుండె జబ్బులు వచ్చే అవకాశం తక్కువ.

* తీపి తిన్నప్పుడల్లా మధుమేహం వస్తుందేమోనని మనందరిలో ఎంతోకొంత భయం దాగే ఉంటుంది కదూ! ఆ భయాన్ని తరిమికొడతాయి అల్‌బుకారా పండ్లు. ఇవి మధుమేహాన్ని దరిచేరనివ్వవు.

* వీటిలోని జింక్‌ గాయాలను త్వరగా మాన్పితే, ఇ-విటమిన్‌ కళ్ల కింద నల్లచారలను ఇట్టే పోగొడుతుంది.

* ఇవి కడుపునొప్పి తగ్గిస్తాయి. ఊపిరితిత్తులు, మూత్రపిండాలను ఆరోగ్యంగా ఉంచుతాయి. శరీరంలో హాని చేసే సూక్ష్మక్రిములను బయటకు పంపేస్తాయి. కొన్ని రకాల క్యాన్సర్‌లను నిరోధిస్తాయని ఇటీవలి పరిశోధనలు తెలియజేస్తున్నాయి.

* బరువు తగ్గాలనుకున్నవారు ఈ పండ్లను తగిన మోతాదులో తింటే చాలట. ఈ సంగతి లివర్‌పూల్‌ విశ్వవిద్యాలయం తేల్చింది. పన్నెండు వారాల్లో బరువు తగ్గినట్టు ఆ అధ్యయనం నిరూపించింది.

* డి-విటమిన్‌, క్యాల్షియం వృద్ధి చెంది ఎముకలు, దంతాలు పటిష్టంగా ఉంటాయి. మలబద్ధక సమస్య నుంచి బయటపడొచ్చు.

* అల్జీమర్స్‌ బారిన పడకుండా కాపాడతాయి.


గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని