Updated : 15/12/2021 04:00 IST

మొక్కల డాక్టరమ్మ! 

మనకి సుస్తి చేస్తే ఆసుపత్రికి వెళ్తాం! మరి మొక్కలకి అనారోగ్యం వస్తే? విశాఖ ప్రజలు రామేశ్వరీ సింగ్‌ దగ్గరకు తీసుకెళ్తారు. చచ్చిపోయే మొక్కలకు కూడా  ప్రాణం పోసే ఆమెని అక్కడి ప్రజలు  ‘మొక్కల డాక్టరమ్మ’ అని ప్రేమగా పిలుచుకుంటారు. తాజాగా ఐరాస ప్రశంసలు అందుకున్న ఆమె చెప్పే మొక్కల సంగతులు ఏంటో తెలుసుకుందాం..

టెర్రస్‌పై నాలుగు మొక్కలు పెంచాలంటే ఎక్కడ నీరు దిగి పైకప్పు పాడవుతుందో అని భయపడతాం. కానీ రామేశ్వరి టెర్రస్‌పై ఏమాత్రం బరువు పడకుండానే వేలమొక్కలని తేలిగ్గా పెంచి చూపించారు. పరిమిత స్థలంలో, తక్కువ నీటితో వేల మొక్కలను పెంచుతూ.. నగర ప్రజలకు కాలుష్యంపై అవగాహన పెంచుతున్నందుకు యూఎన్‌డీపీ (యునైటెడ్‌ నేషన్స్‌ డెవలప్‌మెంట్‌ ప్రోగ్రాం)ప్రశంసించింది. ఈమె భర్త ప్రతాప్‌సింగ్‌ తోమర్‌ ఇంధన వనరులు వెలికితీసే నిపుణులు. ముప్పై ఏళ్ల కిందటే వీళ్ల కుటుంబం విశాఖలోని నాయుడుతోటలో స్థిరపడింది. అక్కడే రామేశ్వరి చెట్ల పెంపకాన్ని అభిరుచిగా మలుచుకున్నారు. 25 ఏళ్ల పాటు ఇంటి వద్దే కూరగాయలు, ఆకుకూరలు, పూలమొక్కలు పెంచుతూ మొక్కల పెంపకంపై లోతైన అవగాహన పెంచుకున్నారు. ఉద్యాన శాఖ నిర్వహించే వర్క్‌షాపులకూ హాజరై.. మట్టి నాణ్యత, అంటుకట్టడం వంటి నైపుణ్యాలు సాధించారు. కాలనీవాసులకు మొక్కల పెంపకంపై అవగాహన పెంచుతూ వారి ఇళ్లకు వెళ్లి మరీ వాటి సంరక్షణ చేసేవారు. ఇలా ఆమె చూపిన చొరవతో చాలామంది మిద్దెతోటలు పెంచడం మొదలుపెట్టారు.

సరిపడ ఎత్తులో పెట్టడంతో..

‘మనం ఎంత ప్రేమతో పెంచితే... మొక్కలు అంత చక్కగా పెరుగుతాయి.  నీళ్లు పోయడానికి అందే ఎత్తులో స్టాండులని ప్రత్యేకంగా తయారుచేయించి పెట్టుకున్నా. దీనివల్ల నడుం నొప్పి రాదు. మిద్దెపై మొక్కల పెంపకం అనగానే తడికి పైకప్పు పాడవుతుందనో, బరువు పడుతుందనో చాలామంది వెనకడుగేస్తారు. ఆ భయం లేకుండా తుంపర, మంచురూపంలో నీటిని వెదజల్లే ప్రక్రియలు చేసేదాన్ని. నా దగ్గర వేల మొక్కలున్నాయి. వాటికి వారానికి 200 లీటర్ల నీరు సరిపోతుంది’ అంటారు రామేశ్వరి. యూఎన్‌డీపీ విపత్తుల నిర్వహణ, వాతావరణ మార్పులను తట్టుకునే నగరాల అభివృద్ధి ప్రాజెక్టులో భాగంగా టెర్రస్‌ గార్డెనింగ్‌లో రామేశ్వరి చేస్తున్న కృషిని గుర్తించి ఈ ప్రాజెక్టులో భాగస్వామురాలిని చేసింది. ఆమెతోనే  ప్రజలకు  సూచనలు, సలహాలు ఇప్పిస్తోంది.

మొక్కలకు ప్రాణం పోస్తూ..

రామేశ్వరికి తెలిసినవారు ఎవరైనా వాళ్లింట్లో మొక్కలు ఎండిపోతుంటే వెంటనే ఆమెను సంప్రదిస్తారు. ఆమె వారింటికే వెళ్లి అవసరమైన సంరక్షణ చర్యలు తీసుకుంటారు. లేకపోతే తనింటికే మొక్కలని తీసుకెళ్లి చక్కగా పెరిగిన తర్వాత తిరిగిస్తారు. ఇలా నగరంలోని వందల మందికి సూచనలు, సేవలు అందించారు. మిద్దెపై మొక్కలు పెంచాలనుకునేవారికి ఎంత విస్తీర్ణంలో పెంచాలి, నీరెంత అవసరం వంటి సూచనలు ఉచితంగానే అందిస్తారు. వీటితోపాటు అరుదైన మొక్కలని ముచ్చటైన కానుకలుగానూ మార్చేస్తున్నారామె. అలా ఆమె తయారుచేసిన మొక్కలు ఇప్పుడు విదేశాలకు సైతం ఎగుమతి అవుతున్నాయి. టెర్రకోట కుండీల్లో మొక్కలను ఉంచి కోరిన విధంగా పెయింటింగ్‌ వేసి ఇస్తున్నారు. కొవిడ్‌ సమయంలో వైద్యులకు ఇలాంటి వినూత్నమైన బహుమతులను అందించారు. ఇక పెళ్లిరోజులు, పుట్టినరోజులకూ మొక్కలనే అందమైన కానుకలుగా ఇచ్చే సంస్కృతిని అలవాటు చేస్తున్నారు. ఆమె చేస్తున్న కానుకల్లో మీనియేచర్లు, గాజు పాత్రల్లో ఉంచే టెరేనియంలకు ఆదరణ ఎక్కువ. ఇన్‌స్టాగ్రామ్‌లో రామేశ్వరి ప్రారంభించిన ‘పాట్స్‌ అండ్‌ ప్లాంట్స్‌’ పేజీకి చక్కని ఆదరణ లభిస్తోంది. ఇవన్నీ చేయడానికి రామేశ్వరి కుమార్తెలు శృతిసింగ్‌, స్నేహల్‌ సింగ్‌ తోడుగా ఉంటున్నారు.

ఫొటోలు చూసి చెప్పేస్తారు...

మొక్కల వేళ్లని బతికించేందుకు ఏడు రకాల సేంద్రియ పదార్థాలతో ప్రత్యేకమైన ఎరువుని తయారుచేసి దాన్ని ఆసక్తి ఉన్నవారికి అందజేస్తున్నారు. తన దగ్గర్నుంచి మొక్కలను తీసుకువెళ్లిన వారి వివరాలు తీసుకొని ప్రతి వారం ఫోన్‌ చేసి ఫొటోలు తెప్పించుకుని అవి చక్కగా పెరిగేందుకు తగిన సలహాలు అందిస్తారు.

- రావివలస సురేష్‌, విశాఖపట్నం


Advertisement

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని