Updated : 13/04/2022 05:41 IST

సిగ తరిగిపోతుంటే!

జుట్టున్నమ్మ ఏ కొప్పేసినా అందమనేది తరతరాల నానుడి. కానీ ఆ జుట్టే రాలుతోంటే మనకు ఎక్కడలేని బెంగ. కారణాలు వెతికేస్తుంటాం, తెలిసినవన్నీ ప్రయత్నిస్తుంటాం. ఇటీవల ఆస్కార్‌ వేడుకల్లో విల్‌స్మిత్‌ భార్య జాడా పింకెట్‌ గుండు విషయంలో వివాదం గుర్తుందిగా! ఆమెది ఫ్యాషన్‌ కాదు.. అలోపేసియా ఏరియేటా అని తెలిశాక దీని బారిన మేమూ పడ్డామంటూ ప్రపంచవ్యాప్తంగా సామాన్యుల నుంచి ప్రముఖుల వరకూ బయటకు రావడం మొదలైంది. దీంతో తమదీ అదే సమస్యేమోనని నెట్టింట వెతుకుతున్న వారి సంఖ్య కోట్లకు చేరిందట. ఇంతకీ ఏమిటిది? దీన్నెలా అధిగమించాలి?

అలోపేసియా ఏరియేటా.. ఓ ఆటో ఇమ్యూన్‌ డిజార్డర్‌. మన స్వయం ప్రతిరక్షక కణాలు మనపైనే దాడి చేయడమన్న మాట. తెల్ల రక్తకణాలు కుదుళ్లపై దాడిచేసి, కుంగిపోయేలా చేస్తాయి. దీంతో కేశాల ఉత్పత్తి నెమ్మదించి కుచ్చులుగా జుట్టు ఊడిపోతుంది. సాధారణంగా ఇది ఎక్కువగా 30 ఏళ్లలోపు వాళ్లలోనే కనిపిస్తుంది. ఆపై వారిలో అరుదు. చాలావరకూ వంశపారంపర్యమే. కొందరిలో ఒత్తిడి వల్ల ప్రేరేపితమవుతుంది. ఆస్తమా, డౌన్‌సిండ్రోమ్‌, సీజనల్‌ అలర్జీలు, థైరాయిడ్‌, విటిలిగో ఉన్న కొందరిలోనూ కనిపిస్తుంది. కొందరికి గుండ్రంగా నాణెం పరిమాణంలో ఊడితే మరికొందరిలో తలంతా కురులు రాలిపోతాయి. కొన్నిసార్లు శరీరమంతటా కనిపిస్తుంటుంది.

పెళ్లికాదని భయపెట్టారు...

ఊహ తెలిసినప్పట్నుంచి నా జుట్టు పలుచనే. స్కూల్‌కీ విగ్గు పెట్టుకుని వెళ్లేదాన్ని. దాంతో అవమానాలూ ఎదుర్కొన్నా. టీనేజ్‌లోకి అడుగుపెట్టాక అలొపేసియా బాధితుల గ్రూప్‌లో చేరా. కొందరి అనుభవాలు విన్నాక నా ఆలోచనలో మార్పొచ్చింది. నేనెలా ఉంటానో అందరికీ అలానే కనిపిస్తానని ఇంట్లో చెప్పా. ‘ఎవరు పెళ్లి చేసుకుంటార’ని బామ్మ, అమ్మ అభ్యంతరం చెప్పారు. ఓరోజు బంధువుల్నీ, స్నేహితుల్నీ పిలిచి అందరి ముందూ గుండు చేయించుకున్నా. తర్వాత నా గురించి సోషల్‌ మీడియాలోనూ పంచుకోడం మొదలెట్టా. ‘జుట్టు లేకపోయినా సంతోషంగా, అందంగా ఉంది. అలా నేనెందుకు ఉండకూడద’నే ఆలోచనని కొందరిలోనైనా తేవాలన్నది నా ఉద్దేశం. ఆ విషయంలో విజయవంతమయ్యా. పెళ్లికి దీన్ని అడ్డుగా భావించేవాళ్లతో జీవితం ఎలా పంచుకోగలననిపించిందే తప్ప బాధపడలేదు. తర్వాత నన్ను నన్నుగా మెచ్చిన వ్యక్తి వచ్చాడు. టెక్సాస్‌లో ఉంటూ కార్పొరేట్‌ కెరియర్‌నీ కొనసాగిస్తూనే, మోడల్‌గానూ రాణిస్తున్నా.

- నీహర్‌ సచ్‌దేవ్‌

రకాలు..

* అలోపేసియా ఏరియేటా టోటాలిస్‌.. తల మీద కురులన్నీ రాలిపోయి.. గుండులా మారిపోతుంది.

* అలోపేసియా ఏరియేటా యూనివర్సాలిస్‌.. కనుబొమ్మలు, రెప్పలు సహా శరీరమ్మీద ఎక్కడా వెంట్రుకలుండవు.

* ఓఫియాసిస్‌ అలోపేసియా.. గుండ్రంగా తల పక్కలా, వెనుక ప్యాచ్‌లుగా ఊడిపోతుంది.

* డిఫ్యూజ్‌ అలోపేసియా.. ఒక్కసారిగా వెంట్రుకలు పలచబడిపోతాయి.

కొందరిలో దీని ప్రభావం మొదట గోళ్లపై చూపిస్తుంది. సూదితో గుచ్చినట్లుగా, ఇంకొన్నిసార్లు తెల్లని మచ్చలు, గీతలు కనిపిస్తాయి. గోళ్లు పల్చబడటం, మెరుపును కోల్పోయి నిర్జీవంగా, పొరలు పొరలుగా ఊడటం.. కనిపిస్తాయి. జుట్టు ఊడే ముందు విపరీతమైన దురద, మంట వంటివీ ఉంటాయి.

ఇరవై ఏళ్లకుపైగా పోరాటం..! నాకు పదేళ్లప్పుడు ఈ సమస్య మొదలైంది. ఎన్నో చికిత్సలు తీసుకున్నా ఫలితం లేదు. చివరికి అలోపేసియాగా తేలింది. తల మీద ప్యాచ్‌లతో బయటకు వెళ్లాలంటేనే సిగ్గేసేది. ఎన్నో మందులు, ఇంజెక్షన్లతో పరిస్థితి మెరుగుపడింది. స్కూల్లో అందరూ నవ్వుతుంటే వాళ్లతో కలిసి నేనూ నవ్వేదాన్ని. అలాగైనా కొన్నాళ్లకు తగ్గుతుందని! ఓసారి తట్టుకోలేక తిరగబడ్డా. హేళన ఆగింది. నాలో ఆత్మవిశ్వాసమూ పెరిగింది. జుట్టు కూడా. ఉద్యోగంలో చేరాక నష్టాలొచ్చాయని తీసేశారు. ఆ ఒత్తిడికి అలోపేసియా తిరగబెట్టింది. 23 ఏళ్లుగా ఇదే పోరాటం. ఇక అలసిపోయా. శారీరకంగా ఏ ఇబ్బందీ లేనప్పుడు అందం పేరిట దీన్నెందుకు భరించాలనుకుని గుండు చేయించుకున్నా. ఇప్పుడు బెంగళూరులో పని చేస్తున్నా. ఇక్కడా నా వెనక హేళనలు, నవ్వులు! అందరికీ మెయిల్‌ పెట్టా. ‘నా గురించి తెలుసుకోవాలంటే నన్నే అడగండి, వెనక మాట్లాడొద్ద’ని. అప్పట్నుంచి ఇవన్నీ ఆగిపోయాయి. ఇప్పుడూ చికిత్స తీసుకుంటున్నా.. కాకపోతే ఒత్తిడి తగ్గించుకోవడానికీ.. ప్రశాంతంగా ఉండటానికే.

- పరోమిత, బెంగళూరు.

పరిష్కారమేంటి?

అలోపేసియా అందరికీ ఒకేలా ఉండదు. దీని ప్రయాణాన్ని కచ్చితంగానూ చెప్పలేం. చల్లని వాతావరణంలో దీని ప్రభావమెక్కువ. కొందరికి వెంట్రుకలు ఊడినా తిరిగి వచ్చేస్తాయి. ఓసారి వచ్చాక మళ్లీ పోవు. కొత్త చోట ఊడినా మళ్లీ వస్తుంటాయి. ఇంకొందరిలో మాత్రం విపరీతం. మచ్చలు పడటమే కాక శాశ్వతంగా వెంట్రుకలు రాలిపోతాయి. ప్యాచ్‌ల సైజుల్లోనూ మార్పులుంటాయి. దీన్ని పూర్తిగా నివారించడం కష్టమే. కానీ ప్రభావాన్ని తగ్గించొచ్చు. కార్టికో స్టెరాయిడ్స్‌ను ప్యాచ్‌ల వద్ద ఇంజెక్షన్ల ద్వారా ఇస్తారు. దీంతో ఆ ప్రదేశంలో జుట్టు తిరిగి పెరుగుతుంది. వెంట్రుకలు విపరీతంగా రాలుతోంటే పైపూతగా లేదా మందు రూపంలో కార్టికో స్టెరాయిడ్స్‌ను వాడాలి. ప్యాచెస్‌ విస్తరిస్తోంటే మాత్రల్నీ, పైపూతగా మినాక్సిడల్‌ ద్రావణాన్నీ ఇస్తారు. టాపికల్‌ ఇమ్యునో థెరపీనీ సూచిస్తాం. కనీసం 12 వారాలు వాడితేనే ఫలితం కనిపిస్తుంది. దాంతోపాటు ఒత్తిడిని తగ్గించుకోడానికి ధ్యానం, యోగా వంటివి చేయాలి.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.